Shillong, April 20: Bhuddist toromni saksa niksenggipa dilgipa Dalai Lama-ni kosako namgija bimingko ra·bana jotton ka·enganiko jegalangenba, Shillong songjinmao donggipa Buddhist toromko ra·gipa manderang Bristibar salo, Shillong, Lumparing-ni Buddhist Monastery-o bi·rimaniko dakangaha.
Union Territory of Ladakh-ni Kargil aro Leh-rangoni Tibet-ni manderang baksana, Shillong songjinmao donggipa Tibet-ni manderang, uamangni saksa toromni dilgipa Dalai Lama-ni gimin ong·gijagipa video-ko social media-o manderangni watpipraataniko raken jegalangaha.
Ia kan·dikgipa video-o me·a bi·sa saksana agangipa kattani gimin bang·a manderang social media-rango toromni dilgipako ong·gija matnangtokahachim, aro iani bidingo Dalai Lama, uni kattarangchi bi·sana, uni nokdangna aro ripengskarangna maiba gisiko sa·dikaniko on·ahaode kema ka·china gita manderango kemakoba bi·ahachim.
Ia kan·dilgipa video-o toromni dilgipani agangipa kattani gimin Dalai Lama-na chakpaaniko on·angengon, Shillong Tibetan Buddhist Association (STBA), iandakgipa kamko jegalangenba, tom·tomani, ka·saani aro meli-nangrimani kattarangko manderangona gipatani kamko ka·angaikuchina gita uamang, toromni dilgipako mol·molangaha.
Iakoba poraie nina man·gen: Gital Assembly-ni protchong-na tarigipa design-ko HPC ra•chaka
