Vadodara, March 21: Meghalaya-ni skotong minister Pa Conrad K. Sangma, Robibar salo sak 80 gipinrang (padyatris) baksa Gujarat-ni Vadodara district-ni Kareli-oni Gajera-ona a·songni pagipa Mahatma Gandhi-ni skang British-ni chasongo ja·achi re·dile mesokanggipa Dandi-ko daksningpaanio bakko ra·e gimik km 15-rangko ja·achi re·e matchotataha.
Azad Ka Amrit Mahotsav-ni a·bachengao a·songni Prime Minister Pa Narendra Modi, “Dandi March”-ko mija March 12 tarikoni Sabarmati Ashram-oni nisanko ripripe a·bachengate on·angaha aro iako re·baenggipa April 5 tariko matchotatgen.
Bristish-ni sason ka·ani kosako chakate a·songni namgnina batanggimin bilsi 90-rangna skang dakdilanggipa Mahatma Gandhi ji-ni namgipa kamrangko gisik ra·na aro India a·songni jakgitel ong·ani bilsi 75 ga·dapaniko gisik ra·na da·o ja·achi re·jomaniko ong·ate uni kamko daksningpaaniara namen nangchongmotgipa ong·a ine skotong minister Pa Conrad K. Sangma aganprakaha.
Dandi-ona re·mikkangangmitingo Mahatma Gandhi -ni rama tong·sao uamangni re·jomaniko dontongatgipa biap ba song Gujarat-ni Kareli minggipao skotong minister Pa Conrad Sangma, Gujarat sorkarini minister Ma Vibhavari Dave baksa Gandhi ji-ko salni bako mande ra·anikoba dakangjolaha.
“Dandi march-ko ong·atanichi a·gilsakni manderangko aiao inmanataha. Iako gimik sak 80 manderangchisan a·bachengaiaha indiba ka·sinsin British-ni kosako chakate ja·kurangko ga·anio lakni lak manderang ja·mano bak ra·tokaha,” ine Pa Sangma agan-parakataha.
Re·jomanio bakko ra·giparangna Kareli-o uni aganprakanganio, India a·songni bak ong·pae an·tangtango rasong chachina gita ua, pilak chadamberangkon didiaha. India a·songni jakgitelanio bak man·gipa gipin mongsonggipa dilgiparang baksana Gandhi ji-ni a·songna on·gilanirang aro on·kanganirangko an·ching pangnan gualjana,” ineba ua didiangkuaha.
Mahatma Gandhi-ni dakdile mesokanggipa apsan ramako ra·jrike daksningpana gita a·songni skotong ministerrrangko okamchimongahani gimin Prime Minister Pa Narendra Modi-koba ua dingtangmancha mittelaha. Salgro-salaram a·jako namroro-silroroatna Prime Minister-ni dingtangmancha gisik on·tee kamrangko ka·atengani giminba ua, salni tom·anio jinmani mikkango agan-janapjolaha.
“Indita bilsirangna kingking galchipako man·gipa salgro-salaram a·jako ua (PM) dingtangmancha gisik on·e nirokataha aro da·o PM-ni dilanichi salgro-salaram a·ja dingtangrorona a·bachengengaha. Ua an·tangba, a·jaona chang 15 rangna batpile wenangaha aro apsandake pilak Union Minister-rangkoba salgro-salaramchina wenangtokchina gita didijolaha. Salgro-salaram a·jana dingtang bimango namroro-silroroaniko ra·baanina anga uko dingtangmancha salgro-salaram gimikni palo mittelna kusi ong·a,” ine skotong minister aganprakaha.
British-chi sason ka·ani kosako chakate dakgrikdilgiparang salgro-salaram a·jaoniba bang·en gnang ine jinmana aganprakatengon, Meghalaya a·dokoni U Tirot Sing, Pa Togan Sangma aro U Kiang Nongbah-maang gimikan Khasi, Garo aro Jaintia Hills-o British-chi sason ka·ani kosako chakate dakgrikdilangaha ine ua talate on·angaha.
Jakgitelanina an·tangtangko on·kange a·song gimikoni dakgrikdilgiparang baksana salgipeng India aro salgro-salaramni dakgrikdilgiparang gimikkoba India a·songni manderang gisiktangtango ma·sie ra·na nanga ineba Pa Sangma, jinmao aganprakangjolaha.
