Guwahati, Apr 3: Batanggimin jarangonin Delhi-ni Chief Minister Arvind Kejriwal aro Assam-ni Chief Minister Himanta Biswa Sarma-ni gisepo jera ra·grikanirangko nikna man·engon, Kejriwal-ni Assam-ona re·baani somoio ua Assam-ni manderangna tol·e sakki on·angaha ine Assam-ni Chief Minister Himanta Biswa Sarma matnangataha.
Sarma-ni parakatani gitade, Kejriwal-ni Guwahati-ona re·baani somoio uni sorkari, lak 12 kamrangko on·aha ine Assam-ni manderangna aganangahachim.
“Delhi-o lak 1.5 kamrangsan bangbang ong·e dongengo ua maikai lak 12 kamrangko on·na man·gen?” ine Assam-ni Chief Minister sing·doataha.
Ua Kejriwal-na chittiko seatgen aro ka·donggipa ong·ode uni chittina ua sechakchina ineba Sarma aganaha.
Re·anggipa Robibar salo, Delhi-ni Chief Minister aro Aam Aadmi Party (AAP)-ni convenor Arvind Kejriwal baksana Punjab a·dokni Chief Minister Bhagwant Mann, Guwahati songjinmani Sonaram kal·chakramo ong·atanggipa jinma tom·bimonganio manderangna aganprakangahachim ine nikna man·a.
Ian Arvind Kejriwal-ni Assam-o skanggipa tom·bimonganiba ong·ahachim.
Ia tom·bimonganio Delhi-ni Chief Minister, jinmana aganprakengon, Assam-o AAP chegenchimode Assam-ni dedrang sakantian kamrangko ka·e cha·na man·gen ine ku·rachakaniko on·angenba, Assam-o kamrangko on·ani namen ka·sinenga ine Assam-ni Chief Minister Himanta Biswa Sarma-ko matnange aganangahachim.
Iana skang, Assam-ni Chief Minister Himanta Biswa Sarma-ko tangka ‘cha·rakgipa’ ine Delhi-ni Chief Minister matnangahani gimin Kejriwal-ko ‘ka·pong’ ine Sarma matnangskaahachim.
Untalan, Delhi CM aro Assam CM-ni gisepo jera ra·grikanirangko nikna man·engachim.
