Dibrugarh, May 23: IIT Kharagpur-ni chatro Faizan Ahmed-ni manggisiko ra•ongkatpiltaina gita Mongolbar salo, Assam Medical College aro Directorate of Forensic Science Guwahati-ni official-rang, Dibrugarh-o donggipa Amolapatty Kabarsthan ba gopramko cho•piltaiaha.
Ia chatroni manggisiko ra•ongkatna gita gopramko cho•piltaiani somoio Kharagpur Town Police Station-ni police officer-rang, sianggipa chatroni nokdang, magistrate aro gipin official-rangba dongpaaha.
Manggisiko ra•ongkatani ja•man coffin-o chipe, morgue ba manggisirangko donchakgipa biapo donataha aro ia manggisiko, post mortem ka•taina gita Budbar salo Kolkata-ona ra•anggen.
Ia chatroni siani a•selko name ma•sina gita uni gopramoniko cho•piltaichina re•anggipa April-ni 25 tariko Calcutta High Court, ge•etaniko on•angahachim.
Bilsi 23 ong•gipa Faizan Ahmed, IIT Kharagpur-o mechanical engineering-ko poraiengachim aro uni sogimin manggisiko 2022 bilsini October 14 tariko, IIT Kharagpur-o donggipa Lala Lajpat Rai Hall of Residence-ni room nombor C-205-oniko man•ahachim.
College-ni official-rang, ia chatroko an•tang so•ote sia ine a•kangahaoba, uni nokdangni manderangde uko so•otasa ine a•kangtokskaahachim.
