Guwahati, April 11: Assam a•dokni Dibrugarh-o donggipa Paltan Bazar-o niam gri chalaienggipa Aadhar card centre-ko Robibar salo Dibrugarh-ni police-rang rim•aha.
Koborko on•ani gitade, iani bidingo police-rang mande sakgittamko sing•sandina gita rim•aha aro uamangara Lakhimpur-oni bilsi 29 ong•gipa Dipen Doley, bilsi 27 ong•gipa Bitupan Deori aro bilsi 30 ong•gipa Aibi Deori ong•a.
“Dibrugarh-ni Paltan Bazar jolo niam gri Aadhar card centre-ko chalaienga ine koborko man•soenba chinga ua biapona re•ange am•sandion, ua jolo donggipa Atiquor Rahman minggipa mandeni noko niam gri Aadhar card centre-ko mande sakgittam chalaienga ine nikeaha. Chinga ia mande sakgittamko rim•baaha aro iani bidingo nambate am•sandiangkuna gita mande sakgittamko rim•dapaha,” ine Dibrugarh police station-ni officer-in-charge Rajiv Saikai parakataha.
Ia mande sakgittamoniko police-rang, desktop, laptop-rang, Aadhar form-rang aro gong 5000 tangkarangkoba man•aha ineba Saikai parakataha.
Police officer-ni aganani gitade, Aadhar card-ko tarie on•na gita ia manderang, Aadhar card kingprako gong 300 ka•e ra•rongachim.
Ia manderangni jakkalenggipa AR01M 8130 Tata Nixon garikoba police-rang rim•aha ine u•iataha.
“Chinga iani bidingo talbate am•sandianirangko dakengkua aro Dibrugarh-o niam gri chalaienggipa pilak Aadhar card centre-rangko rim•na man•gnok,” ine Saikai parakataha.
Koborko on•ani gitade, iandake niam gri Aadhar card centre-ko chalaie manderang bang•a tangka paisarangko man•engani gimin Assam-o bang•en iandakgipa Aadhar card centre-rangko niam gri chalaitokenga.
