Shillong, March 14: Adita salrangna skang Umiam Lake-oniko manggisiko man·gipa aro East Khasi Hills a·jani Mawlaingut songoni saksa Omega Myrthong-ko ka·saninggija dake so·otani gimin Mawlaingut songni Dobar Shnong baksana Diengiei Durbar Area (DDA), Mongolbar salo jinma re·jomaniko ong·atenba jegalaniko dakangaha.

So·ota man·gipa mandeni dingtang dingtang be·enni bakrangko Ri-Bhoi a·jani ning·o donggipa Umiam chibimaoniko Umiam Police Station-ni police official-rang re·anggipa March 8 tariko man·ahachim ine nikatna gita man·gen.

Omega Myrthong-ko so·otani bidingo jinma jegalgrimaniko dakani chin gita, Rangbah Shnong, Secretary Shnong, ASHA workerrang, NGO-rang, Shilliangum Diengiei aro Nongpoh-oni Driver Association of the Alto Tourist, songni ma·gipa-pagiparang, skigiparang aro chatro-chatrirang aro Diengiei songoni bang·a manderangni bak ra·angpaanio, Diengiei Durbar Area (DDA), Mongolbar salo gisim ba·rani nisanrang baksa jinma re·jomaniko ong·atangenba, so·otgipa manderangni kosako jegale, sianggipa mandena kakket bichalko on·china gita dabiangtokaha.

Jinma re·jome jegalani ja·man, sianggipa mandeko gisik ra·na gita mombatirangko so·e bakrimanikoba ong·atangjolaha.