Shillong, Sept 13: Dingtang dingtang namdapatanirang aro nanganirangko ra·chakna gita Meghalaya Cabinet Sombaro tom·a A·dokna mongsong nangchongmotgipa namdapatanirang aro minggipin nanganirangko ra·chakna gita Meghalaya Cabinet, Sombar salo tom·angaha.
Skanggipao, Meghalaya Human Rights Commission Rules 2014-ko namdapataniko cabinet ra·chakangaha aro ia niamrangko da·o Meghalaya Human Rights Commission Amendment Rules, 2021 ine mingskagnok.
A·dokni dingtang dingtang department-rango maming chanchisogija koros ong·anirangna aro nangdapgipa korosrangna jakkalna man·na gita Contingency Fund of Meghalaya (Amendment) Bill 2021-koba Cabinet, ra·chakangjolaha aro Meghalaya Contingency Fund-ni chu·gimik tangkako gong kror 305 oniko gong kror 505 ona bariatnasienga.
Una agreba, Meghalaya a·doko Bharat Net project-ko gong·rake ra·gatna man·na gita a·doko BHARATNET Project-ko a·bachengatanina India sorkarini Department of Telecommunication, Meghalaya sorkarini IT & Communications Department aro BBNL-ni gisepo dolgittam MoU-na soi ka·grikanggipako namdapanikoba Cabinet, Sombar salo ra·chakanga baksana, Meghalaya State Consumer Dispute Redressal Commission aro District Consumer Disputes Redressal Commission-ni padotni kamko jako ra·china gita seokna on·sogimin bimingrangkoba cabinet ra·chakangaha.
Iarangna agreba, Zila Sainik Welfare Officer ong·e Major Dr. K. I. Singh-ni kamko re·baenggipa bilsi-gittamrangna ra·dodapatanikoba cabinet ra·chakanga baksana, sorkarini kamko ka·enggiparangna medical reimbursements, chong·motan sana-bananio koros ong·anina sorkarini gampilskaanio medical Attendance Rules-ni ning·o sana-banani gitalgipa gadangrangko aro mikkangchina gital chamsoanirangko man·chapatna gita Meghalaya Medical Attendance Rules 1981-ko ra·galchina chanchie ra·baanikoba ra·chakangjole uni palo Meghalaya Medical Attendance Rules 2021-ko ra·chakangskaaha.
