Shillong, May 17: A·dokni SSA skulo skienggiparangni dingtang dingtang neng·nikanirangni bidingo golpona gita, Meghalaya Sarva Shiksha Abhiyan Schools Association (MSSASA), a·dokni Education Minister Pa Rakkam Sangma-ko Butbar salo grongangaha.
SSA-ni skigiparangna uamangni dormaharangko bank account-o joljolan watatchina gita ru·uta bilsirangoni dabienganiko a·dok sorkarini bon·kame knachakanina, MSSASA-ni padot Aristotle Rymbai, skanggipao a·dokni education ministerko aro dakchakgipa skotong minister Pa Prestone Tynsong-koba dingtangmancha mittelpilangenba, a·dokni budget-o Samagra Shiksha Abhiyan (SSA)-na bang·a gipin project-rangko chamdape on·china gita skigiparangni dabienggipani giminba minister baksa agangrikaha ine u·iatangaha.
Ia dabianirangko chu·sokate on·na gita a·dok sorkarini ja·kurangko de·atengani gimin aro skigiparangna dormaha on·anio neng·nikaniko chagrongjana gita sorkarini chanchie tik ka·anggipani gimin minister uamangna u·iatangan baksa, 2022 oni 2023 bilsini financial year-ni skanggipa installment-ko re·baenggipa June jani bon·achibara ba jani a·bachengachibaraan India sorkarini tangkarangko watatgnini giminba education minister uamangna u·iataha ine Rymbai parakataha.
SSA-ni skigiparangna dormahako on·na gita a·dok sorkari, corpus fund-oniko budget-ko chame on·aha ine aganangkua baksana, jasani gong kror 26 oni 27-mang gapenggipa March jani dormahakoba SSA-ni skigipa sakantinan re·baenggipa antini gisepon watatnaba dongaha ineba Rymbai u·iatangaha.
A·dokni education minister-ko grongangani somoio, Meghalaya State Education Commission-ni memborko aro chairman-ko songani gimin aro SSA skulrango skigipani biaprang bangbang ong·enggipao skigiparangko kamna seokani giminba association, chachirimangjolaha.
Indake ong·engon, a·doko segatgimin skulrangni gimin namedake ma·siani ja·man aro poraienggipa chatro-chatrirang bang·batgipa skulrangna bilko on·ani gimin a·dok sorkari chanchie tik ka·aniko dakangnaba gnang ine education minister, association-na u·iatangaha.
