Baghmara, Sept 20 : South Garo Hills a⋅jao songdongenggipa pilak chadamberang, me⋅chikma dolni Self Help Group-rang aro jako ra⋅e kam ka⋅enggipa pilak songdonggiparangni janggitanganiko Tourism-ni a⋅jao ra⋅dona aro scheme-rangni bidingo ui⋅atjolna miksonge September 17 aro 20 tariko District Commerce & Industries Centre-ni gita mikgaoatani programe-ko ong⋅atangaha ine Nongalbibra Tourism Soceity-ni Padot Te Digros D Shira aganaha. Uni aganani gita District Commerce & Industries Centre-ni jako ra⋅e kam ka⋅dilanichi jolo songdonggiparangna ka⋅e rim⋅e cha⋅na cholrang bang⋅batgen aro department-ni gita skie on⋅anirangko dakenga ine janapaha. Iasan ong⋅ja indiba Tourism unit-ko kulie Loan-rangko on⋅an baksa songre songabatanio gipin biaprangona tik ka⋅atgrikani kamrangkoba ong⋅katatgen.
Batanggimin bilsioba Tousim Society-ni gita Me⋅mang koksi Festival-ko Sportss Tourism Department aro District Administration baksa nangrime Nongalbibrao ong⋅aton, dingtang dingtang kal⋅susaanirangkoba ong⋅atjolaha indiba tangka paisao neng⋅nikanichi ua somoioni joljol bading chiwalani kamrangko a⋅bachengna man⋅rikjaha indiba da⋅alo skia man⋅gimin manderangna DCIC-ni gita dakchakaniko on⋅e cholrangko man⋅gnok ineba Te Digros Shira talatdapaha.
