Shillong, June 30: Meghalaya Basin Management Agencyni District Project managementni gita, game-cha•giparangko bading-chiwalgiparangko a•doko nambatatani bidingo East Jaintia Hills a•jani Khlieriato ong•atangaha.
Ia tom•anio East Jaintia Hills Districtni Deputy Commissioner Abhilash Baranwal mongsonggipa sokgipa ong•e bak ra•angpaaha. Tom•a a•bachengaon, dingtang dingtang songni manderang uamangni bading-chiwala aro ge•a- gamanio chu•soka chu•sokjani bidingo saksa sakgipina talatgrikangaha.
Ia programko ong•atani miksonganian game-ge•e cha•gipa aro an•tangtangna janggi tangani cholko dake ra•enggipa manderangna aro uamangni chu•sokanirangko saksa sakgipina agangrike didianiko on•grikna ine ong•a. Meghalaya a•dokara bang•a kamrangon nambate dakna nanganirang dongkuenga. Bang•bata bosturangkon an•ching a•palchikosan jakkalenga. Unigimin a•doktango chu•onga gita aro ja•tango chadengna amna gita re•mikkangna nanganirang bang•kuenga ine Deputy Commissioner Abhilash Baranwal aganaha.
Ia tom•anio dol 10 dolrangna uamangni nambate kamrangko ka•ahanina mittelpilani boksisrangkoba DC aro gipin officialrangni jakchi suale on•jolangaha.
Tom•anio superintendent of fisheries H. Kharbuki, H Nongpluh District Animal husbandry and vetenary officer aro gipin East Jaintia Hills districtni officialrang dongpae bak ra•angaha.
