Ampati, March 31: Congress dolni ka·mabatgipa gadango kam ka·giparang baksa CLP dilgipa Dr Mukul Sangma, Rangsakona elakani MLA Pa Zenith Sangma, Dengnakpara GHADC elakani INC candidate Ma Sadhiarani Sangma aro Boldamgre GHADC elakani Pa Stevie M. Marak-maang gimikni dongpaanio re·baenggipa Garo Hills Autonomous District Council (GHADC) eleksino susaenggipa INC candidate-rangna chakpaaniko on·e mija Mongolbar salo Ampati-o tom·aniko ong·atanggipao ku·monge kamrangko ka·na gita salni bako tom·bagipa mande jinmako mol·molangaha.
Dr Mukul Sangma tom·anio an·tangan dal·batgipa sokgipa ong·e, GHADC eleksino rakbate kamrangko ka·angna pilak Congress partyo kam ka·giparang aro songni-nokni manderangko ku·mongdilangaha.
Ru·utgijan ong·nasienggipa GHADC eleksino Congress party, Executive Committee (EC)-ko rike ong·siangenggipa GHADC-ko tangchaatpiltaie gimaangenggipa A·chik jatni niam-reti, dakbewal-rikbewalrangko mikkangchi name ripingangna aro A·chik a·songni manderangko mikkangchi naljokatna ku·mongrime kamko ka·na nangenga ine Pa Sangma aganprakaha.
Da·alo na·simang gimikan nikna man·enga, GHADC-o kam ka·giparang dormaha man·gijan bilsi-gittam gapna am·engjok aro kam ka·giparang maiko cha·e janggi tanggen ine janapatan baksa, da·o a·doko NPP dolchi rikdilenggipa sorkari GHADC-o kam ka·enggiparangni dormaha on·china kingkot dabianirangko da·onaba knachakgija dongenga ineba ua da·oni sorkariko matnange aganangkuaha.
Indake dakani kamrangchin ja·mano GHADC-ko bon·ate Panchayati Raj-ko ra·gatna cholko ra·enga ine agananga baksana, A·chik jat sakantian ia eleksino simsakna nangenga, jensalo Panchayati Raj-ko ra·gatgen unode Nokma-Sordar-rangni maming bil dongjawaha aro uko warachaksonade jatgimik ku·mongna nanggen ineba Dr Sangma agandapangaha.
