Shillong, Dec 5: Pekatgipa ringani aro cha·ani samrangko jakkalani aro uarangko palsrukani a·doko bang·roroaniko Meghalaya a·dok dakgrikchichamiting ong·enga. A·dokni skotong minister Conrad K Sangmani nikani gitade, chadamberangna somoi gita agan-skie on·anirango olgrokenganian pekatgipa ringani aro cha·ani samrangko jakkalaniko champengna man·gijani ja·pang mingsa ong·a. Uni gimin, gittim ba songsalni gita chadamberangna ku·ski-ku·pattie on·ani aro sam jakkalgimin chadamberangko dimbrengpile donanian drugs jakkalaniko bon·atani mingsa chol ine Conrad aganaha.
Mongolbar salo, U Soso Tham Auditorium-o Social Welfare Departmentni ong·atgipa DREAM aro BUILD programrango aganengon, chadamberangni jakkalgija dongaigipa changa-sapaniko aro bil-jakko mingnama kamrangna jakkale dongchina gita cholrangko dake on·na nanganiko skotong minister dingtangmancha janapaha.
“A·dok sorkarini bang·a progam aro policyrangan maia an·chingna gamchatbata una miksonge tarigiminrang ong·a, aro an·chingna gamchatbatgipara chadamberangan” ine agane, chadamberangan a·songko namroro-silroroatgipa gamrangoni gamchatbatgipa mingsa ong·aniko Conrad raken aganaha.
A·dokni niksamsoe dakenggipa programrangko miksonga gita chu·sokatna gitade je manderangnan uko miksonge tariaha ua manderangna namgniko on·anisa mongsongbatgipa ong·na nanggen, ua miksongani kamrangko matchotatnasan dakani ong·ja ineba CM aganaha.
Sports, music, entrepreneurship aro uandakgipa a·barango a·dok sorkarini ja·ku de·e dakenggipa kamranga chadamberangnan mongsong ong·a, uandakgipa a·barango bil-jak, changa-sapani aro somoiko jakkalanichi namgijagipa kamrangona sokanganiko champenganiba ong·aniko ua aganaha, “Uamangni janggi tanganio miksongani aro ua miksongaona sokna nanganiko chadamberang name u·iahaode uamang unan kingkot ong·e re·mikkanggen.”
DREAM, uan ‘Drug Rehabilitation, Elimination and Action Mission’ ine miksonga aro Community-State Forum BUILD inani chu·gimikara ‘Bringing Unity in Locale Against Drugs’ ine ong·skaa. Uaranga drugs jakkalaniko bon·atna aro uko drugs-ni a·kolo ga·akgiminrangko salchroe name janggi tangna dakchakna gita Social Welfare-ni bikotgipa programrang ong·a.
BUILD program-ni bidingo aganengon, Meghalaya a·doko gittim aro songsalni gita ja·ku de·anirangan bilakgipa ong·a aro songsalo dilgiparangni kamrangan songsalni dingtang dingtang kamrango mongsongbegipa ong·a ine CM aganaha: “Pekatgipa samrangko jakkalani gita dakgipa sko sagnirang sokbaon songsalan mongsonggipa kamko jako ra·e dakgnigipa ong·a, aro uara pekatgipa samrangko jakkalaniko champenga ba bon·atanisan ong·ja, indiba drugs jakkale ga·akgimin manderangko salchroe dakchakpilna gita DREAM gita dakgipa kamrangko jako ra·anian ong·a.”
Police, Health aro Social Welfare departmentrang sko aro jak dondime kam ka·na nangengon songsalni manderang baksaba bakrimna nanga; drugs jakkale ong·siaona sokgipa manderangko namgija biming man·kamatgija uamangko ka·sachake aro ma·sichake jakkindilna nanga ineba CM Conrad aganaha.
Chief Ministerna skang aganengon, a·doko neng·nikanirangko man·ode Meghalaya Police songsal baksa nangrime kam ka·ronga ine Meghalayani DGP, L R Bishnoi aganaha. Drugs jakkalanio batroroani a·selrangko janape agananengon, me·sarangsan ong·ja, dambe me·tra aro dal·gimin me·chikrangni gisepoba uko jakkalgiparang batroroenga ine DGP agandapaha.
Iakoba poraie nina man·gen: Telangana-o sildoreng ga•aksrue a•sel ong•anio IAF-ni pilot sakgni sia
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
