Nongpoh, Nov 14: Dolongko kabatgipa rikamni a·arang adita salna skang rurongna gita a·bachenganichi Dwarksuid song gita Shillong By-Pass sorokko dolong kabatgipa bilgriahani a·sel salantio uko re·ruraenggiparang jajrenganirangko parakangaha.
Dolong sambao a·arang ruronganiara mija anti Sonibar salo ong·ahachim. Iani bidingo social media-o video-rangko watpipratgipao gitade, a·dok sorkarini dongimin niam aro ja·rikatanirang gita jrimako salruraenggipa trak aro gipin garirangni dolongko batsotmitingomangba bilgridapaniko nikna gita man·aha.
Ia dolongko rikchakatmitingon be·srena gita a·bachengani gimin Shillong By-pass rama gita aro gital kabatgipa dolong gita dal·dalgipa aro jrimgipa garirangko re·na Meghalaya sorkari re·anggipa bilsion beng·e donahachim ine nikatna man·gen.
Ua dolong gita bostu jrimako salgipa trak garirang aro ton 10-na bate salanirangkoba a·dok sorkari raken champengatahachim. Unbaksana, jakkalchengna gita Bailey Bridge-koba sorkarian kae on·pilahachim indiba rikarang namjani a·selo manderangba ua dolongkode jakkaltokskajaha.
Indake ong·engon, salantin gita ia dolongko re·ruraenggipa songni manderang dolongni bilgridaproroaniko nike apoti ka·angtoka baksana, re·baenggipa salrangona jajrenganirangko parake ia dolongko a·dok sorkari gital dake kabate on·na gita ja·manchakata ong·ode aro jrima bostuko salenggipa gari-gorangko champengatjagenchimode ua dolongni ru·utgijan be·grugnini giminba songni manderang parakangtokaha.
