Tura, Nov 14: Bilsianti manirongbaenga gita, South Garo Hills a·jani ning·o donggipa Nongal Bibra songoni St. Francis De Sales Secondary School-o Children’s Day ba bi·sarangni salko Sombar salo maniangaha.
Programona, Rongara-Siju-ni MLA Pa Rakkam A Sangma, mongsonggipa sokgipa ong·e bi·sarangni salko manianio bakko ra·angpaaha.
Bi·sarangni salko manianganio, re·anggipa changni MBOSE porikkako see letter mark-rangko man·e nambata gadango chu·sokanggipa skulni chatro-chatri sak 43 -mangna Appreciate Certificate baksana tangkani boksisrangkoba on·angaha.
Unbaksana, St. Francis De Sales Secondary School-o mikkangchi Higher Secondary School-koba niroke chalaiangchina gita jolni MLA Pa Rakkam Sangma, skulko nirokenggipa Father Abraham-ni jako tangka gong lak 5,00,000 -koba pakwate on·angjolaha.
