Shillong, Jul 24: National Eligibility-cum-Entrance Test (NEET) porikkao paper leak ong•aniko jegale jingjengattokengon, chatro chatrirangni nangnikanirangko knatime ra•na nangengani gimin Gambegre-ni MLA Mehtab Chandee A Sangma aganaha.

Iani bidingo kobor ra•timgipa manderang baksa agangrikengon, chatro chatrirangni jegalanirangko ma•mong sorkari maikai jako ra•enga, ua an•tangde mamingkoba aganpana man•jawa indiba chatro chatrirangni dabianirangara namen nangchongmotgiparangan ong•a ine Sangma aganaha.

Chatro chatrirangara songsalni bakan ong•a aro mikkangchi a•songko chalainagiparangan ong•ani gimin chatro chatrirangni nangnikanirangko name knatime ra•na nanga ine ua aganaha.

NEET-ni miksonganirangko pe•engama ine sing•anina aganchakaniko on•angengon, admission-rangko aro seat-rangko on•anio parak ong•ani dongna gitasa NEET porikkako a•bachengataha ine Sangma aganaha.

Batanggimin changrangoba apsan dakgipa obostarangko nikna man•aha ine janapatengon, porikkarangko nambate ra•na nangenga ine Gambegre MLA, chinko mesoke on•angaha.