Williamnagar, Jul 24: Bristibar salo, All Garo Hills Cook-cum-Helper Association (PM Poshan), Williamnagar Girls Higher Secondary School-o tom•aniko aro press conference-ko ong•atangenba, Mid-Day Meal ba PM Poshan Scheme-ni ning•o, kam ka•enggipa manderangna dormahako japrako gong 900-oni gong 9000-ona bariatchina a•songni Prime Minister aro ma•mong sorkariko didiangaha.
Uamangni dabienga gita dormahako gong 900-oni gong 9000-ona bariatjagenchimode, Meghalaya a•dok gimikon kamrangko ka•gija jingjengatgen ineba association mikrakataniko on•angaha.
Iani bidingo kobor ra•timgiparangna talataniko on•angengon, PM Poshan-ni ning•o cook aro helper-rangna bilsio ja 10-nikosan dormahako on•aia aro bilsi 20 batpilonan uamangna japrako gong 900 ka•esan dormahako on•engkua ine association-ni president Paul D Sangma parakataha.
Kam ka•giparangna dormaha bariatchina gita uamang changni chang a•songni Prime Minister, Union Education Ministry, Finance Ministry, Meghalaya sorkari aro Garo Hills-ni MP-naba sedoatahachim indiba da•alonan uamangni dabianirangko knachakkujaenga ineba ua aganaha.
Ma•mong sorkarini on•enggipa gong 900 dormahachide ia chasongo janggi tangna namen neng•ani ong•a ine janapatengon, PM Poshan-ni ning•o cook aro helper-ni kamko ka•enggiparangna japrako gong 9000-ona dormahako bariatchina Sangma, a•songni Prime Minister-ko mol•molataha.
PM Poshan-ni kamko ka•enggiparangna dormaha bariatchina mol•molaniko knachakjagenchimode, Meghalaya a•dok gimikon ia scheme-ko dontongatna draatako man•gen ineba All Garo Hills Cook-cum-Helper Association mikrakataniko on•angaha.
