Shillong, Naitung 25: Ka Meghalaya hynne ka sngi kala pdiang burom ïa u samla Kitkupar Nongsiej uba la jop ha ka lympung World Championship of Performing Arts (WCOPA) 2026, ha kaba la sakhi ba da ki spah ngut ki paidbah ki la ïalum lang ha Khyndai Lad ban iohi da ki jong ki khmat ia u samla uba wanrah ka nam bad burom iaka Ri bad iaka Jylla.
Ia kane ka jingpdiang burom la pynlong lang da ka Sorkar Jylla lyngba ka tnad Directorate of Sports and Youth Affairs bad ka Don Bosco Media Network Television (DBMN TV) bad ha kane ka sngi la pynkup burom ïa u samla Kitkupar uba la mihkhmat iaka ri India haka WCOPA 2026 kaba la long ha Las Vegas.
Shwa kane ka sngi, ia u samla Kitkupar la pdiang sngewbha na Lokpriya Gopinath Bordoloi International Airport Guwahati da kiba ha iing ha sem, ki nongkyrshan na ka shnong Kynshi bad ki nongmihkhmat ka DBMN TV.
Mar ia poi ha Mawlai ISBT, la pdiang burom ia u da ka Sorkar Meghalaya shwa ban leit synran ia u sha Khyndai Lad ha kaba ki nongkyrshan bad paidbah kila ap ban sakhi da la ki jong ki khmat.
Haba kren ha kane ka jingïalang, u Acting Director ka Directorate of Sports and Youth Affairs u Bah Paia War Nongbri u la ïaroh ïa u samla Kitkupar bad banjur ba udei u nuksa na ka bynta ki samla ka Meghalaya da kaba ong ba ka jingaiti lut bad ka sap jong u ka la wanrah ïa ka jingsarong ïa ka jylla bad ka ri baroh kawei.
U la ai khublei ruh ïa ka bynta jong ka Don Bosco Media Network Television ha kaba la don bynta ban pynroi ïa ki samla kiba don sap ba ki don bad u la ai ruh ka jingïaroh ïa ka jingkyrshan ba la naka iing ka sem bad ki paidbah ka shnong Kynshi.
Ha kane ka jingpdiang burom la sakhi ruh ka jingrwai naka Chevinia Lyngdoh Mawnai, kaba jop iaka Sur Kynud Season 1, kaba la rwai daka jingrwai ba shna hi kata ‘Kum u Khlur to Nongsiej’ bad na Shellevah N. Jyrwa ba jop iaka Sur Kynud Season 4.
Haba ai jingkren sha ki paidbah, u samla Kitkupar u la ai khublei ïa ka Sorkar Meghalaya khamtam ïa u Myntri Rangbah ka Jylla Conrad K. Sangma halor ka jingkyrshan pisa kaba la pynlah ïa u ban ïakhun ha kane ka lympung jong ka pyrthei.
U samla kitkupar ula pynpaw ruh ka jingsngewnguh ïa ka Directorate of Sports and Youth Affairs, ki kmie ki kpa, ki nongkyrshan kiba la ïai ïeng ha syndah jong u ha baroh shilynter ka jingïaid lynti jong u.
Ula ai khublei ïa ka Don Bosco Media Network Television kaba la pynwan dur ïa ka jingim jong u bad iaka sap ba u don, da kaba ong ba ka jingïaid lynti jong u ka la sdang hadien ba u la jop ïa ka Sur Kynud Season 3, kaba la ai ïa u ka rynsan ban sei iaka sap ba u don hakhmat ka pyrthei baroh kawei.
Naka liang u Managing Director ka DBMN TV u Fr Michael Makri u la pynskhem biang ïa ka jingangnud ban kyntiew ïa ki sap na kane ka thain shatei lammihngi bad u la pynbna ba ka nongjop jong ka Sur Kynud Season 4 ka samla Shellevah N Jyrwa ka la pynrung kyrteng ban leit Audition na ka bynta ka Britain’s Got Talent.
Ka jingjop jong u samla Kitpupar Nongsiej ha ka WCOPA 2026 ka ioh ka jingiaroh iaka kam rwai jong ka Meghalaya, ha kaba ka Sorkar jylla ka la ban jur ba ka jingjop jong u kan long ka jingai mynsiem ia ki nongrwai.
Pule ruh : Kyntu ka Dr Chandee ia ka Sorkar Pdeng ban shah skhor ia ka jingsngewkhia ki samla halor ka NEET
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
