Shillong, Nov 10: Meghalaya a•doko drugs ba pekatgipa sam jakkalani aro niam gri badinganiko champengna police-rang rakbee kamrangko ka•engon, East Jaintia Hills a•jaoba gong crore 4-na batgipa samrangko Sukrobar salo, Lumshnong-o donggipa State Cement karkanao so•e galna man•aha.
Ia pekatgipa samrangko dingtang dingtang biaprangoniko police-rang rim•na man•ahachim.
Iani bidingo kobor ra•timgiparangna talate on•angengon, rim•a man•gipa samrangara ming 51 case-rango rim•ako man•gipa samrang ong•achim aro ia case-rangoni ming 25-de West Jaintia Hills-o, ming 10-de East Khasi Hills-o, ming 14-de West Khasi Hills-o aro ming 2-de Ri Bhoi a•jao rim•gipa case-rang ong•achim ine a•dokni Director General of Police (DGP) Dr LR Bishnoi parakataha.
Rim•a man•gipa samrangara gong crore 3-mangni gitade heroin samrang, gong lak 80-mangni gitade ganjarang aro gong lak 20-mangni gitade gusu samrang ong•achim ineba DGP aganaha.
Ia samrangko rim•anio niam gri sam badinggipa sak 500-na baten manderangkoba rim•aha ineba ua aganaha.
