Shillong, Mar 22: A•gilsakni gipin biaprango gitan World Water Day-ko Mongolbar salo, East Jaintia Hills a•jani Byndihati-o donggipa St Anthony’s College-ni auditorium-oba maniangaha aro ia salko manianio Meghalaya a•dokni Social Welfare Minister Kyrmen Shylla, mongsonggipa sokgipa ong•e bakko ra•angaha.

Ia World Water Day-ko manianio Shylla, tom•bagiparangna aganprakengon, batanggimin sal somoirango manderang china simsakjahani a•sel da•ororo dingtang dingtang nokdangrangna aro dokkanrangna chi sale on•gipa tanker-rang batrorobaskaengaha ine parakatenba, mikkangchi an•tangtangni namgnina chirangko ripinge rakkichina gita manderangko didiangaha.

Sorkarini aro sorkari official-rangni rakbee kamrangko ka•anichi Greater Rymbai Water Supply Scheme, Synrang Umlawe Combined Water Supply Scheme, Ummyrho Combined Water Supply Scheme aro dingtang dingtang scheme-rangko ra•gate on•na man•aha aro ia scheme-rangoni mitamrangde da•o matchotangengaha ineba Shylla parakataha.

2022 bilsini gisepo Jal Jeevan Mission-ni ning•o songadam nokadamrango donggipa nokdang ge•antionan ringani chirangko on•na gita sorkarini donenggipa nisanni gimin janapatengon, ia nisanko chu•sokatna gita rakbee kamrangko ka•engani gimin PHE department-ni official-rangko aro kam ka•giparangko mittelpilangenba, ia nisanko chu•soksranggipa ong•atna mikkangchiba apsan daken kamrangko rake ka•angkuchina gita Minister didiangaha. Ia World Water Day-ko maniani bak gita skulo poraienggipa bi•sarangna dingtangmancha exhibition competition-koba ong•atangaha.Ia tom•anio dongpae jinmana aganprakanggipa gipin manderangara, East Jaintia Hills a•jani Deputy Commissioner Abhilash Baranwal, State Cement Plant-ni Estate Manager JK Singh aro gipinrang ong•a.