Shillong, Oct 22: Batanggimin salo obosta ong·anggipa, jean East Khasi Hills district-ni Ichamati songo ong·ahachim, ua mamilani da·o nataipilenganiara mikkang bilsio West Bengal-o ong·nasienggipa eleksinni a·selsa ong·engnaba donga ine Home Minister Pa Lahkmen Rymbui re·anggipa Budbar salo aganaha. Ichamati songo a·doktangni ong·gijagipa gipin jatrangko onchep-mikchepe dakanirang dongenga ine matnanganirangara chu·gimikan maming orto gri ineba Home Minister aganaha.

Ua mamlako ra·e jatsa-jatgipinni gisepo golmal rangko ra·bajachinaba sakantiko mol·molanio, “an·ching jeko dakoba, a·doko da·o jedake name tom·tome dongenga uako golmal ka·na nangja. Jeba aro jedakgipa obosta ong·oba uarangko jatsa-jatgipinni gisepona ra·bajachina gitaba anga mol·molna nangnika” ine Pa Rymbui aganaha.

Indake ong·engon, adita salna skang, All Bengali Youth & Students Organization (ABYSO)ni a·dokona wenbana am·ani gimin ian a·dokni mamlako aroba da·o tom·tome dongenganiko jakdangdikepaachi golmalko ra·banasa jotton ka·enga inenba Khasi Students’ Union (KSU) uana jegale jingjengatangaha.

North Khasi Hills District-ni KSU aro South Khasi Hills District-ni KSU memborrangni re·anggipa Butbar salo jegale jingjengataniko Ri Bhoi-ni Toll Plaza, Pahammawlein-o aro East Khasi Hills-ni Sohra-o ong·atangaha.

Janapna gita, Ichamati songo gipin jat songdongenggiparangko mongsongbate me·chikrang aro bi·sarangko onchepe dakanirang dongenga ine matnanganina uamangna dakchakaniko on·na gita All Bengali Youth & Students Organization (ABYSO)ni ua biapona wenbana ine bil on·ako am·ataniko a·dok sorkari ra·chakjaha.