Williamnagar, Oct 22: Koborko man·soani gita East Garo Hills-ni police dolrang mijal Bristibar salo Nengmandalgre buring diltuaoniko adita silchidareni guli-barutrangko man·aha.

Ka·dongna man·gipa mandeoniko koborrangko man·sringani gimin Simsang chibima nalsachipakgipa Nengmandalgre buring diltugipani samtangtangoniko East Garo Hills Police dolni sandirikkitataniko dakon namen bilakbegipa silchidare rokomsa Sniper Rifle-ni 7.7 mm gulli-barut 85 ko man·aha ine koborna parakataha.

Sandie man·gimin guli-barutrangko nirikkina Williamnagar police station-ona ra·bae uni bidingo sandirokaniko dakdapangna mamlako segataha aro dongkuenggipa silchidarerangkoba am·e man·dapna sandiataniko dakatengkua.

Janapjolna gita, Garo Hills-oni adita bilake kamko ka·anggipa bobil dol GNLA-ko mikkango donge re·dilgipa aro sianggipa Sohan D. Shira, jean batanggimin somaio police dolrang baksa gogrikanio guli nange siahachim, uni buring diltugipa biaprango dape donnue donanggipa silchidarerangko am·sandiatani rango East Garo Hills-ni police dolrang chu·soken am·e man·piltokenga ine nikatna man·aha.