Shillong, May 13: Salsani gisepo sak 591 manderang COVID-19-ko man•dapahani gimin Meghalaya sorkari, East Khasi Hills a•jao lockdown-ko re•baenggipa May 24 tarikona ra•dodapataha.
East Khasi Hills a•jao lockdown-ko skanggipa May 5 tarikoni May 10 tarikona ra•gatchengahachim indiba salantian COVID-ko man•giparang batrorobaengani gimin sorkari, lockdown-ko ra•dodapattaina nangahachim. East Khasi Hills a•jao ian gnigipa changna lockdown-ko ra•dodapatani ong•engahachim.
Tura aro Jowai jillarangni gimin janapatskaengon, ia biaprango deputy commissioner an•tangtangan obostarangko niroke ja•kuko de•china sorkari bilko on•manaha ine Meghalaya a•dokni Deputy Chief Minister Prestone Tynsong parakataha.
East Khasi Hills a•jao May 24 tarikona lockdown-ko ra•doattaiahaon, gipin a•jarangoba antini bon•ao, chong•motan Sonibar aro Robibar salgnina chu•gimik lockdown-ko ra•gatskaengachim.
Official-rangni u•iatani gitade, konta 24-ni gisepo sak 18 manderang COVID-ni a•sel siangdapaha aro ia sak 18-oni sak 16-de East Khasi Hills a•jao, saksade East Jaintia Hills-o aro saksade West Jaintia Hills a•jao ong•achim.
Ia apsan salon sak 228 manderang, ia sabisioni nampilskana gita man•aha ineba kobor on•aha.
Da•o dipet Meghalaya a•dok gimiko COVID man•e dongenggiparang gimik sak 3726 gapengaha aro ia sak 3726-oni sak 2121-de East Khasi Hills a•jao aro sak 502-de Ri Bhoi a•jao ong•enga.
Indake ong•engon, a•doko COVID-19-ko man•giparang batrorobaengani gimin ua sorkari official-rang baksa tom•e chanchirimangaha ine Deputy Chief Minister parakataha.
“Obostarang namjabatroroengani gimin chinga East Khasi Hills a•jao lockdown-ko antisana ra•dodapataha aro uandaken da•o ia a•jao lockdown-ko re•baenggipa May 24 tarikni pring 5:00 bajiona ra•gatanggen,” ine Tynsong parakataha.
