Tura, Jan 30: Robibar salo, Meghalaya a·dokni Chief Minister Conrad K Sangma, skanggipa Matrilineal Research Centre-ko Tura-ni Edenbari-o donggipa Harding Theological College-o nokdonggae on·angaha aro ia centre-ko nokdonggae on·angani somoio, North Tura-ni MLA Thomas A Sangma, Harding Theological College-ni skigiparang aro gipinrangba dongpae bak ra·angaha.
Ia Matrilineal Research Centre-ko nokdonggae on·anganio a·dokni Chief Minister, jinmana aganprakangengon, college ba university-rangni namgipa ong·anide uamangni research ka·aniosa pangchakbata ine parakangaha.
“A·gilsak gimikon an·ching namnamgipa college ba university-rangko niatgenchimode, uamang pangnan an·tangtangni research ka·aniosa gisik on·batronga ine an·ching nikna man·gen. An·chingni a·doko research ka·ani ba am·sandianirang dongjaenga ine an·ching nikna man·gen. Ia research centre-ko kulianichi an·ching A·chik jatni giminsan ong·aigija, an·ching gita me·chikchipakko ra·gipa dingtang dingtang jatrangni daka rikanikoba am·sandina cholrangko on·engani gimin ian an·chingna namen mongsonggipa centre ong·gen. Iandakgipa research centre-ko anga nika dongkujachim,” ine Sangma aganaha.
SMART Village Movement-na Meghalaya a·dok baksa bakrimenggipa USA a·songni California songjinmao donggipa Berkley University-ba ia Matrilineal Research Centre-ni research ka·anirango bakrimaniko on·na kusi ong·enga ineba Chief Minister parakataha.
See rakkianiko nangchongmotani gimin janapangengon, me·chikchipakko ra·ani bewalrangara skangonin maming see rakkiani gri ku·sikmangmangchi aganritingbaaniko ja·rikbaanisan ong·aia ine Chief Minister parakataha.
