Shillong, June 9: Adita salrangna skang, East Khasi Hills a·jani Dangar primary health centre (PHC)-o an·o donggipa me·chik saksani siani a·selko am·sandichina gita Meghalaya Human Rights Commission (MHRC) ge·etangaha.
Ia a·selni bidingo Meghalaya Pradesh Mahila Congress (MPMC)-ni badi ka·ani gimin koborko man·soenba ia a·selko am·sandichina ge·etaniko on·angaha ine Budbar salo, MHRC-ni Secretary parakataha.
Dangar PHC-o kam ka·enggipa doctor aro nurse-rangni simsakjahani a·sel bilsi 28 ong·gipa Muny R Marak, siangna nangaha ine MPMC matnange badi ka·doangahachim.
Indake ong·engon, ia a·selni bidingo Commissioner & Secretary-ni gadango ong·gipa officer-chi inquiry-ko dakenba Commission-na report-ko on·china a·dokni Chief Secretary MS Rao-na ge·etaniko on·ataha ine MHRC parakataha.
