Guwahati, March 1: Assam-o da·o dolgittam bakrime BJP-chi sorkariko rikdilenggipa baksa sokbaenggipa Assam assembly eleksino susagrikangna, Congress dolchi re·dilenggipa gimik dol-sni bakrimenggipana campaign-ko ka·chakna gita ma·mongni Congress dolni jakrikra Ma Priyanka Gandhi Vadra, Sombar salo Assam a·dokona re·baaha.
Sokbaani ru·utgijan Ma Priyanka, India-o torom olakichakram biaprangoni 51-gipa biapo ong·enggipa aro Koch jatni raja Naranarayana-ni batanggimin 1565 bilsi jolo rikpiltaigipa aro niksenggipa Kamakhya Devi Temple-o bi·e pattianiko ra·chengaha.
Iani bidingo Assam Congress Media Department-ni chairperson Ma Bobbeeta Sharma-ni koborna agan-talatani gita, Assam-ona wenbaanio Ma Priyanka, party office-o kamko jako ra·enggiparang baksa aro Assam eleksino pu·onangtoknasienggipa bang·a dingtang dingtang jatni manderangko gronge agangrikanga baksana Mongolbar salo Tezpur songo mande jinma tom·anioba aganprakanggen.
Congress dolni dilgipa, a·dok gimikoni kam gri ong·enggipa chadamberangna campaign-ko ka·angan baksa cha bagano kam ka·enggipa me·chikrang aro Selp-Help Group-ni manderang gimikkon grongjole agangrikanggen.
Iana skang, Congress-ni padot gitcham aro Lok Sabha-ni membor Te Rahul Gandhi, mija February 14 tariko a·dokona wenbae Assam-ni Sivasagar-o mande jinma tom·ao aganprakangaha.
2016 bilsio BJP-chi bakrime rikdilenggipani sasonona re·bakuja dipet, chu·gimik bilsi 15 (2001 oni 2016) rangna kingking sasonni bilko jako ra·angipa Congress dol, dolgittam Left party jekai CPI(M), CPI aro CPI(ML) aroba All India United Democratic Front (AIUDF), a·joltangni political dol Anchalik Gana Morcha (AGM), Bodoland People’s Front (BPF) iamang gimik baksa melie re·baenggipa eleksino susaangna gita dal·batgipa bakrimani ba ‘Mahagathbandhan’ -ko bikotaha.
BJP, mija bilsi December jao Bodoland Territorial Council-na pu·onangani ja·man ua somoio bakrimgipa BPF dolko watgale uni palo United People’s Party Liberal (UPPL) baksa gital dake bakrimtaiskaani ja·mano cha·bokaniko man·eming, BPF mija Robibar salo Congress dolchi re·dilenggipa dal·batgipa bakrimanio ja·napeaha.
Indake ong·engon, BJP dol sokbaenggipa eleksino gital bakrimgipa UPPL aroba Asom Gana Parishad baksa melie Assam-ni saliram jolchipak a·bri jatni mande bang·gipa Bodoland a·jao susae niangna gita tik ka·aha.
Assam Assembly-o sak 126 donggipa memborna pu·onataniko re·baenggipa March 27, April 1 aro April 6 tarikrango gadang-gittam dake ong·atanggen, indake on·gimin vote-rangko May 2 tariko parakatskagen.
