Tura, Feb 26: Sombar salo Meghalaya Assembly-na pu·onataniko dakna gita Tikrikilla-ni Jangnapara polling station-ona polling officer ong·e watatako man·gipa saka bilsi 30-ong·gipa chadambe, mija Sonibar attamo West Garo Hills-ni ning·o donggipa Potamati songo uamangni re·angenggipa gari a·sel ong·e janggitangko gimaataha.
Gambegre Block-o MGNREGA-ni Technical Assistant ong·e kamko ka·enggipa Chesan Ch Marak, uni polling team-ni gipin sak 8 manderang baksa Tura-oni Tikrikilla -china mija Sonibar attamchibara re·chakatangahachim. Uandake, Mahindra pick up gariko salgipa ua somoio ta·rakprete salangenba gariko sason man·rikjae ramasamo a·sel ong·aha ine koborna u·iataha.
A·sel ong·ani ja·man gariko salgipa driver, skoo saknaa man·gipa Chesan baksana gipin mata-bu·a man·gipa polling team-ko gale kataha. Ja·mano, ua jolni manderang aro naljokatgipa dolrangsa uamangko sambajolni hospital-ona ra·angaha aro second polling officer ong·e watatako man·gipa skoo matanichi bilongbee saknaa man·ahani gimin uko Guwahati-chi nambate sanna gita ra·angahachim inbiba, Robibar pringon ua janggi galaha ine u·iataha.
Ua a·selo, sakgni BSF sipairang baksana saksa home guard-ba mata-bu·ako man·e jokkom ong·tokaha. Iani gisepon, Zonal magistrate a·sel ong·gipa biapona sokeani ja·man reserved team baksa, EVM aro VVPAT machine-rangkode Jangnapara polling station-china ra·e re·angaha.
Indake ong·engon, pu·onchakgipa biaprangona polling official-rangko watatna gita pick up trakrangko jakkalani gimin ia a·sel ong·anio nangchape election commission-ko manderang matnangattokaha.
Pick-up trak garirangni da·ororo bang·bate a·sel ong·anichi bang·a manderangni janggirang gimatokahaniko nikenba, iandakgipa maming naljokani donggijagipa gariko nangchongmotgipa kamna maini gimin jakkalna gita nanga ine manderangni gisepo adita sing·doanirangba ong·kataha. Unbaksana, sianggipa mandeni garini ki·sango gae bon·chote noksa ra·gipako niksoeming mandeni janggiko dal·e ra·jani giminba Meghalaya-ni Chief Electoral Officer-ko manderang matnangattokaha.
“Sonibar walo tanggitik a·sel ong·anichi mande saksani janggi gimana gita nangahani gimin, gipin dolrangna pick-up-ni palo gipin garirangko watatskana gita West Garo Hills a·jani Superintendent of Police Vivekanand Singh Rathore parakataha.
Iandakgipa a·selni ja·manosa mikrake kamko ka·aniara, sianggipa Chesan Marak-na aro uni nokdangni manderangnade on·tisani pal ja·manchakdugaa gita ong·skaaha. Unbaksana, election commission ia pilakni gimin niksamsoe aro chanchisamsoe kamrangko ka·atgenchimode iandakgipa obosta ong·gnioniko gelna gita man·naba dongachim ine nikatna gita man·gen.
