Shillong, March 05: Eleksinni result-ko parakatani ja·man, gital sorkariko rikchakatna gita tariengmitingo a·dokni skotong songjinma Shillong-ni Laitumkhrah jolo donggipa HSPDP-ni MLA Methodius Dkhar-ni office nokko mija Sukrobar attamo ma·sina man·gijagipa manderangni wa·al so·aniko National People’s Party (NPP)ni dakchakgipa padot Pa Prestone Tynsong, Sonibar salo raken jegalataha.
Eleksinni ja·man iandakgipa obosta ong·anirangko aro Mawthadraishan-ni MLA Pa Shakliar Warjri-ni ma·drangni nokko manderangni skatang chadrapani kamko jegalatengon, Pa Tynsong, iandake so·so-jengjeng dakani kamrangko maming dakeba ra·chakna man·jawa aro ia kamo pilak dos donggipa manderangko bakbakan rim·e niam gita sastiko on·gen ine Sonibar salo kobor ra·timgiparangna aganangaha.
“Sorkariko riknasienggipa political dolna chakpaanina mangmang indakgipa so·so-jengjeng dakani kamrangko Meghalaya-o ka·na on·jawa ine aganenba, ia pilak so·so-jengjengko ong·atachi a·songni niam-bidiko pangchake, manderangni seoke watatgipa dilgiparangni bilrangko uamangni ra·sekdrana jottton ka·enganiko nikna gita man·enga ineba Pa Tynsong aganangkuaha.
Mitam NGO-rang jekai Hynñiewtrep Integrated Territorial Organisation (HITO) aro Hynñiewtrep Youth Council (HYC)-rangni badiaba political dolrang baksa bakrime kamko ka·enganiko nikna man·gen ine aganangkuengon, Khasi aro Jaintia a·jani biaprangona uamang jensomoio re·angon sana aro badia dolna vote pu·onna gita nanga uko manderangni nikanio paraken agananiko daka aro NGO-rang maming dakeba political-ni kamo parak ong·e jak on·pagiparang ong·na gita nangja ine Pa Tynsong parakataha.
Re·baenggipa Mongolbar salo, gital sorkariko rikchakatna gita seokako man·giparangni ku·mikchetani salo a·songni Prime Minister baksana ma·mongni Home minister-ba bakko ra·epana gitasienga ine u·iatangenba, NPP dolni dakchakgipa padot, unsalo maming kragipa obostarang ong·jana gita niam aro ge·etaniko namedake rakkichina, chinga a·dokni police dolna ge·etaniko on·aha ineba janapatjolaha.
Khasi jatoniko a·dokni skotong minister ong·aniko manderangni nangnikengani gimin sing·angskaon, Meghalaya assembly election-o NPP dolni bang·bate seat-rangko cheaniko manderang ma·sichakna nanggen aro dolni gisepoba uamang Pa Conrad Sangma-kon a·dokni skotong minister ong·piltaichina gita seokaha ine Tynsong agandapataha.
