Shillong, Mar 5: Hill State People’s Democratic Party (HSPDP) MLA-rangni, National People’s Party (NPP) baksa bakrimna manchianiko mande ra·china gita NPP-ni vice president Prestone Tynsong, Meghalaya a·dokni manderangko didiataha.
HSPDP-ni MLA sakgni, chong·motan Methodius Dkhar aro Shakliar Warjri sakgnian, NPP-ni dilanichi sorkariko rikanio bakrimna gita NPP-ni national president Conrad K Sangma-na an·tangtangni chittirangko on·manahachim aro ia sorkario BJP-ni MLA sakgni aro Independent MLA sakgniba bakrimengachim.
Indake ong·engon, so·sojengjeng ong·atani kamrangko ka·jachina aro tom·tomaniko rakkiangchina gitaba Tynsong, a·dokni manderangko didiataha.
HSPDP MLA-rangni ja·ku de·aniko mande ra·china didiatengon, sorkario bakrimgipa ba opposition dolo ong·enggipa je dolba ong·china a·dok gimikni namgninasa kamko ka·na nanga ine NPP-ni national vice president parakataha.
HITO aro HYC dolrangko ua, badiaba political dolrangni ‘political wing’-sa ong·a ineba parakataha.
Ia HITO aro HYC dolgnian, Khasi-Jaintia Hills jolrango NPP-ni kosako matnange manderangko ding·chaoatengachim ine nikna man·a.
Sonibaro ua kobor ra·timgipa manderang baksa agangrikengon, ia chang election-o NPP, dam 26 seat-rangko chee, bang·bate seat-rangko chegipa dol ong·aha aro uandaken seokako man·gipa dilgiparang, Conrad K Sangma-ko a·dokni chief minister ong·na seoktaiskaaha ine Tynsong parakatenba, ia dilgiparangni ja·ku de·aniko mande ra·china a·dokni manderangko didiataha.
Dingtang dingtang dolrangni, Khasi ba Jaintia chief minister-na dabienggipa bidingo janapatskaengon, ia dolrang Khasi ba Jaintia CM-ko nangnikenga ong·ode joltangni dolsako bikote, election-o dam 32 seat-rangko chee nichina ine Tynsong parakataha.
“Da·o dipet joltangni political dolrango sakbri sakbonga MLA-rangsan dongaia aro uamang chief minister ong·na nangnikenga. Iade ong·na amgijani ong·enga. Khasi-Jaintia Hills jolrango gimik dam 36 constituency-rang donga, uni gimin Khasi-Jaintia CM-ko nangnikenga ong·ode, dolsanko bikote election-o susaenba, dam 32 seat-rangko chechengbo. Unode an·tangtangan sorkariko rikna man·aignok,” ine Tynsong talataniko on·angaha.
Sonibar salo, HITO aro HYC dolrang, Khasi CM-ko dabina gita Motphran-o jinma tom·bimonganiko ong·atangahachim ine nikna man·a.
