Tura, March 28: South Garo Hills a•jani Emangre Forest Reserve-o gipin biaprangoni re•bae jabol galanganina Dombe Youth & Cultural Society Emangre (DYCSE) raken jegalataha.
DYCSE-ni dilgipa Krening Marak-ni parakatani gitade, ia biapona uamang re•ange am•sandianirangko dakon, ia biapo galanggipa jabolrang baksana Local A•chik Exporters Association-ni saksa Ollia A Sangma minggipa mandeni jakkalgipa receipt book-rangkoba man•ahani gimin ia biapo uamangan jabolrangko galangahakon ine chanchichipenga.
Emangre Forest Reserve-ara Emangre-oni Wari Chora-ona dakanggipa ramao donggipa biap ong•ani gimin ia biapona jabolrangko ra•bae galaniara Wari Chora-ko nina re•baenggipa tourist-rangnaba namen nitogijaniko ong•atenga ineba DYCSE parakataha.
“Chinga Emangre-o songdong a•chaenggipa manderang an•tangtangan Forest Reserve-onade jabolrangko ra•ange galjaenga indiba noktangtangon chinga jabolrangko chimonge so•e galrongenga. Gipin biaprangoniko iandake jabolrangko ra•bae galaniara songko nokko chonnikani gitaba ong•enga,” ine DYCSE-ni dilgipa Krening Marak, suk ong•gijaniko parakataha.
Iakoba poraie nina man·gen: SSA-o ge 420, sorkari skulrango ge 1,219 skigipani kamrang bangbang ong·e dongenga: Edu Minister
