Shillong, July 8: Meghalaya gimikna ge 40 Elkavya Model Residential School (EMRS)rangko ra·banakenganio, a·dokoni manderangko kamna rim·na gita state reservation policy-ko ra·gataniko ma·mong sorkari namnike ra·chakangaha ine a·dokni Education minister Pa Lakhmen Rymbui, Delhi-chini pil·baa ja·man Bristibaro parakataha.
“Ia skulrango a·dokoni manderangko kamna rim·na gita an·chingni state reservation policy-ko ra·gataniko uamangni namnike ra·chakahani gimin Union Minister for Tribal Affairs, Pa Arjun Munda-ko anga mittelchongmota ine agane, a·dokni skotong minister Pa Conrad Sangma-ni re·dilanggipa a·dokni delegation-na ua iako ku·rachakataha ine Pa Rymbui parakataha.
Elkavya Model Residential School-rangna manderangko kamna rim·anio All India Reservation policy-ko ma·mongni ra·gatna tik ka·angani ja·man state reservation policy-ko ra·gate on·skachina gita a·dok sorkari batanggimin bilsisana skangan ma·mongko mol·molbaenga ineba Pa Rymbui janapataha.
“All India reservation policy-ni gitade Scheduled Tribe (ST)na 7.5 percent-kosan a·kanggimin dongani a·sel, a·doko inditan bang·a chadamberang kam gri ong·tokengoba, uno kamrangko man·na gita maming cholrang donggijaniko nike aro ma·mongni policy-ko ja·rikode namchongmotjawa ine u·ie, iani bidingo chinga mol·molangaha,” ineba ua agandapataha.
Uni aganani gitade, EMRS-ko ra·baanichi poraiggiparangna nama skie ra·aniko dakna namgipa chol ong·an baksana, a·dok gimiko kam gri dongenggipa chasong damberangnaba ian kamrangko ka·e cha·na gita namgipa chol ong·jolgen.
Unomiting, Jowai-ni B.Ed College-ni bidingo nakatenggipa neng·nikanirangkoba NCTE baksa agangrikaha ine minister u·iatdapaha.
