Shillong, August 26: Meghalaya a•dokni gamchatbatgipa aro chubatgipa gadangni rasong “Excellence in Public Service 2022”ko University of Science and Technology-ni Chancellor Mahbubul Hoque-na mande ra•bee Meghalaya-ni Governor Satya Pal Malik-ni jakchi pakwatangaha.
University of Science and Technology Meghalaya-ni Chancellor Mahbubul Hoque, Higher and Technical Education-ni a•bao on•gilanirangna ia rasongko man•anio mongsongbate ua Meghalaya aro Assam-o bidako gipatna kam ka•aha. Unbaksana Padma Shri Ms Trinity Saioo, school-o skigipa saksa ong•oba sak 800mang me•chikmarangko songdamo holdiko ge•na Self Help Group-rangko kulidilanina Governor-ni Excellence Award-ko man•aha. Uamang sakgnina award on•aniko Governor-ni jakchi Raj Bhavan Shillong-o 26 August 2022-o dakangaha.
A•dokni Governor-ni jakchi Award on•aniko ra•chake Mahbubul Hoque, Meghalaya a•dokna Higher and technical education-ni a•bao dangdike on•na cholrangko on•anina Governor aro Meghalaya a•doko songdonngiparangko mittelpilskaaha. Uni kam ka•ani somoirango dakchakani aro bakrimaniko on•gipa Dr Donkupar Roy sagi, gitcham LS Speaker aro Chief Minister P. A. Sangma sagi aro gitchgam Governor R.S. Mooshahary baksana gipin officer-rangko gisik ra•e janapangaha.
Tom•anio Governor Satya Pal Malik, Mahbubul Hoque-ko songadamrango donggipa manderangna bidako gipatna gisik nanggiparangoni saksa ong•a ine janape bidani a•bao uni on•kange kam ka•anirangko sakantian nika ine aganaha.
Tom•anio rimchaksoani kattarangko agane Governor-ni Commissioner & Secretary, IAS Pravin Bakshi, ia award-rangko on•anian Azadi Ka Amrit Mahotsav-ni gita skanggipa ja•ku de•anio ong•enga ine janapaha.
Salgro salaram a•dokrango bidako gipatna kam ka•anio Mahbubul Hoque, Education, Research and Development Foundation (ERDF)-ko 2005 bilsio bikote on•aha.
‘Shikshacharya Award-2019’ rasongkoba ua Asam Sahitya Sabha-ni on•aniko man•aha. Unikoa Community Excellence Award-koba man•aha. Welfare activity-rangkoba dakdilanio ua Endowment Funds, Emergency Medical Assistance, Interest-Free Loans, Relief drives, Health camp-rangkoba dake on•angaha. Bol wa•arangko ripingna gisik nange kam ka•anioba ua Green Campus Initiative-ko a•bachengataha jenan ua dingtang dingtang award-rangkoba man•angaha.
USTM Neighbourhood Mission-ni ning•oba ua dingtang dingtang department-rangko bikotaha jeon sepangjolo donggipa songrang baksana bi•sarangna school tangka paisa gri indin poraiani aro University-ni gadango poraigiparangna tangka gamanirangko komikalate tarie donangaha. Unikoa Pay Back Policy-koba a•bachengataha jeon chatro-chatrirang chu•gimik porikkarangko see chu•sokgiparangna bilsi gimiko gamgimin tangkarangko chu•gimik on•pilaha.
USTM-ni mikkangchi ja•ku de•e kam ka•na miksonganiara 2030 bilsirango World Class university ine minggatako man•na krengani ong•enga. Unikoa Meghalaya a•doko Medical College and Hospital-ko a•bachengatna miksonganirang gnang aro me•chikrangna dingtangmancha university-ko uni songtang Karimganj-o bikotna manchianirangna Assam Sorkarina sedoe niamo bil on•aniko nichakengkua.
