Tura, Dec 17: India a·song gimikon game ge·e cha·enggipa manderang ma·mong sorkarini ra·gatgipa Farmers Laws-ko jegaltokengon, ian game ge·e cha·enggipa manderangni namgnina ra·gatgipa niamrangsa ong·a ine ia Farmers’ Laws ba game ge·e cha·giparangni niamrangko ra·galpiljachina gita Meghalaya a·dokni BJP Kisan Morcha, ma·mong sorkariko didiangskaaha.
Iani bidingo BJP Kisan Morcha Meghalaya-ni dilgiparang, West Garo Hills a·jani Phulbari jolo donggipa Chibinang-o game ge·e cha·enggiparang baksa tom·aniko ong·atangaha aro ia niamrangni bidingo game ge·e cha·enggiparangna agan-talate on·angaha.
Ia tom·anio Meghalaya BJP Kisan Morcha-ni president Promodh Koch, game ge·e cha·enggiparangna ia niamrangni gimin agan-talate on·angengon, opposition dolrangsa ia niamrangni bidingo game ge·e cha·enggiparangna ma·sisretaniko on·na jotton ka·enga ine parakangaha.
“A·songni Prime Minister Narendra Modi-ni dilanichi ma·mongni BJP sorkari, pangnan game ge·e cha·enggipa manderangni namgninasa kamko ka·enga,” ine Koch aganenba, opposition dolrang maming pangchakani gri ia niamrangko jegalna jotton ka·enga ine matnangataha.
“Opposition dolrang game ge·e cha·enggipa manderangko dilsretna jotton ka·enga indiba ia game ge·e cha·ani niamrangara an·chingni game ge·e cha·enggipa manderangna nambata janggi tangani cholrangko on·na ra·gatgipa niamrang ong·achim. Game ge·e cha·enggipa manderangko cha·bokna aro dilsretna jotton ka·engani gimin ia a·song Congress dolko aro gipin opposition dolrangko maming saloba kema ka·na man·jawa,” ineba State BJP Kisan Morcha-ni president parakataha.
Ia tom·anio dongpae jinmana aganprakanggipa gipin manderangara, GHADC-ni gitcham CEM aro State BJP Kisan Morcha-ni treasurer Boston Marak, State BJP Kisan Morcha-ni state executive membor Tezai Mala Rabha aro gipinrang ong·a.
