Resubelpara, Feb 25: Chu·gimik bilsi 30 mangna batpile galchipgimin Bajengdoba-oni Resubelpara aro Mendipathar gita Damra-ona dakanggipa sorokko MDA sorkari gital dake tarina a·bachengatengaha.
North Garo Hills a·jao songdongenggipa manderang aro dingtang dingtang kam nanganirangna ramako re·ruraenggipa manderang indita bilsirangna kingking namen neng·nikaniko man·tokengachim. Da·o, ua sorok dilmongko National Highway (NH) ong·ate re·anggipa 2020 bilsioni dipet tarina gita a·bachengengaha.
Iasan ong·aigija, Garo Hills-oni bang·bea galchipenggipa aro ja·manchake dongenggipa dingtang dingtang namroro-silroroatanirangkoba Meghalaya Democratic Alliance (MDA) sorkarisa niroke pilak kamrangkon a·bachengatengaha.
Resubelpara aro Mendipathar-ko nappake Bajengdoba-oni Damra-ona nadike tarianggipa apchonbegipa ramako, salantio re·ruraenggipa dal·a aro chona motor garirang ge·sa-ge·gipinna ramako watgrike re·namangba namen neng·nikani ong·engachim, indiba bilsignini ja·mano ua rama manderangna namen re·na re·tobatgipa aro nambatgipa ong·skagnok ine nikatna gita man·enga.
Ua sorokko kam ka·anirangba namen tang·doenga, iani gisepon ua sorok gita bostu gate salgipa trak gari ro·gipa bolsa Butbar salo bakkandikgipa sorok gonggeako re·angna man·jae changkete dongengani gimin PWD department-ni JCB-chi ua trak garina rama tarigitike on·anichi chakka ge 16 donggipa trak ua ramako re·angna man·aha aro uachi manderangni neng·nikgnionikoba naljokataha.
North Garo Hills a·jaona re·ruraanio bakandikbatgipa aro seng·sotbatgipa gitcham sorok dilmongko gital dake tariatanichi ua jolo songdongenggipa manderangna mikkangchide namen dakchakbeani ong·gnok ineba ka·dongsona gita man·enga.
