Shillong, March 8: Gambegre constituencyni ning•o donggipa bang•bata skul nokrangon asongchakanirang chu•ongja ine Gambegreni NCP MLA Shri Saleng Sangma aganaha. ” Bang•bata skulrangon asongchakanirang chu•ongsrangja. Bang•a bilsirangnan bang•bata skulrangan asongchakanirang chu•ongtokjae neng•nikanirang ong•tokenga, aro anga bang•bata skulrangnade angni SUPW ni schemeniko on•a jotton ka•aha indiba dam 100 na batpilgipa skulrangna sualnade amsokpaja” ine Assemblyni sing•grikani somaio Saleng Sangma aganaha.
Iana aganchakengon, indakgipa skulrangni neng•nikanirangko, asongchakani-sechakani chu•onggijanirangni gimin maming u•iatanirang dongkuja, indakgipa skulni obostarangko namatna sing•sandie kam ka•anggen ine education minister Lakhmen Rymbui aganchakaha.
