Tura, Feb 7: Ka·ma Ganol chiring Sela Wari sepang jolrango dongenggipa song dam 9-ni Nokmarang nangrime bikotgimin, Ka·ma Ganol Fish Preservation Committee (KGFPC), mijal Sonibar salo tom·e chanchirimangaha.
Ia nangrimgimin song dam 9-rangara Ringgi Songgital, Dodinanggre, Dalmagre, Rongdokgre, Wakantagre, Songkonggre, Asigre, Asibra, Sinnarugre ong·a.
Iani bidingo KGFPC-ni jakrikra Wilbur Sangma-ni kobor ra·timgiparangna parakatani gita, Ka·ma Ganol chiring rikam jolrangoniko ro·ong aro an·chengrangko skatang bikote palanirangko, Ganol chio garirangko salsrime su·sranganirangko, na·tokrangko skatang rim·e nangana bate nosto ka·e galanirangko champengna tom·e chanchirimangaha ine u·iataha.
Committee-ni dongimin niam gita, February 7 tarik dipet Ka·ma Ganol chiringoniko ro·ong, an·cheng bikotaniko, chio gari su·galanirangko aro na·tokrangko rim·e nosto ka·e galaniko raken champengataha.
Indake ong·engon, saoba Committee-ni dongimin niamrangko pe·a ong·ode, niam gita dai gamata baksana rakgipa sastiko on·na gita tik ka·angaha ineba koborna janapatjolaha.
