Tura, Feb 7: Re•anggipa Sonibar walo, North Garo Hills a•jani Tapa Darenchi songo donggipa Operational Group Centre (OGC) ba anti-dacoity camp-ko mande jinma chadrapanio jak donganina North Garo Hills a•jani police-rang, mande sakgniko rim•aha.
Police-rangni u•iatani gitade, ia OGC ba anti-dacoity camp-ko manderangni chadrapanio police-rangni a•tip aditan nosto ka•ako man•aha aro iani bidingo police-rang, ning•tue sandianirangko dakenba, dingtang dingtang niamrango pangchake mande sakgniko rim•aha.
Re•anggipa Sonibar walo, mande saksako dakait dakgipa ine chanchichipenba, North Garo Hills a•jani Tapa Darenchi jolo songdongenggipa manderang, ia mandeko rim•e jinma so•otgalna jotton ka•ani ja•man ia mandeko police-rang jokatna jotton ka•on, ia biapo donggipa anti-dacoity camp-ko jinma chadrapskaahachim aro ja•mano songni manderangko katatna gita police-rang bangbango gopongpongna nangahachim.
Ia jolo dakait dakgipa sakgittam manderang re•ruraenga ine koborko man•soa bakan songni manderang, atte, gol•dik aro uandakgipa silchidarerangko ra•e ua biapona re•baaha aro ua biapo chu peke dongenggipa mande saksako rim•na man•eahachim. Ia mandeko uamang dakait dakgipa manderangoni saksa ong•na nanga ine chanchichipenba atte aro gol•dikrangchi dokna a•bachengtokaha aro ja•mano Tapa Darenchi-o donenggipa OGC ba anti-dacoity camp-ni police-rang ua biapona re•ange ia mandeko jokateahachim.
Indake ong•engon, manderangni tol•e jangbingbangatanirangko skatang bebera•jachina aro skarang niamko jako ra•jachina gita North Garo Hills a•jani police officer-rang, a•jao songdongenggipa manderangko didiataha.
