Tura, Sep 2: Sukrobar salo, All Garo Hills Merchants Association (AGHMA)-ni foundation day-ko Tura-ni District Auditorium-o maniangaha aro ia manianio Meghalaya a•dokni Chief Minister Conrad K Sangma, mongsonggipa sokgipa ong•e bakko ra•angaha.
Ia All Garo Hills Merchants Association-ko 2019 bilsio bikotahachim ine nikna man•a.
AGHMA-ni foundation day-ko manianio a•dokni Chief Minister, jinmana aganprakangengon, joltango bading chiwalenggiparangko tang•doatna gita sorkarini jako ra•e ka•enggipa dingtang dingtang kamrangni gimin agan-talate on•angaha.
Bading chiwalgipa manderangni namgnina kamrangko ka•engani gimin AGHMA-ko mittelpilangengon, kam gri ong•e dongenggipa chadamberangna bading chiwalani kamrangko mesoke on•na aro skie on•na gita ku•cholsan kamko ka•china ua, association-ni membor-rangko aro jolo bading chiwalenggipa manderangko didiangaha.
A•dok sorkarini ra•gate on•gipa PRIME program-ni gimin talataniko on•angengon, ia program-chi a•dok sorkari, bading chiwalani kamrangko tang•doatna tangka paisani gita dakchakanirangko aro loan-rangko on•enga ine Chief Minister parakataha.
Garo Hills-o bading chiwale cha•ani cholrang bang•en gnang ine janapatengon, ia cholrangko ra•e an•tangtangni man•gninasan ong•aigija jatni aro a•songni namroro silroroanina jakkalchina gita Chief Minister didiangaha.
A•doko game ge•e cha•enggipa manderangko dakchakna gita sorkarini ra•gatgipa FOCUS aro FOCUS+ program-rangni gimin talataniko on•angskaengon, ia program-ni ning•o game ge•e cha•enggiparangko Producer Group (PG)-rango dol ong•atenba, tangka paisani gita dakchakanirangko on•enga ine Chief Minister parakataha.
National Livestock Mission-ni ning•o ‘PROGRESS’ ine mingskagipa Rural Backyard Piggery Scheme-ko ra•gatani bidingo talate on•angengon, songni nokni manderangna aro game ge•e cha•enggiparangna wakrangko jile cha•na on•anichi pangkamgipa janggi tangani cholrangko on•na gita sorkari ia scheme-ko ra•gataha aro ia scheme-ni namgnirangko a•dok gimikni sak 40,000 manderang man•gen ine Chief Minister parakataha.
Mission mode-o ra•gatgipa program-rangni gimin janapatskaengon, a•doko Ginger Mission, Turmeric Mission, Milk Mission aro Aqua Mission gita dakgipa program-rangko ra•gatanichi joltango bading chiwale cha•enggipa manderangna gong kror 1000-na baten man•gnirangko on•na man•aha ine Sangma parakataha.
