Tura/Shillong, June 30: Garo Hills-o da•o mikkarang dontonggija wana a•bachengahanichi pilak biaprangon, chi bananirangko aro a•arangni be•ruruanirangko nikna a•bachengtaiaha.
Garo Hills-ko man•chape Meghalaya a•dokni dingtang dingtang biaprango mikkarang jime waanganichi chirang bannaba gnang ine Sombar salosan Indian Meteorological Department (IMD)-oni mikrakataniko on•angahachim ine nikna man•a.
Mikkarang Mongolbar walni 11:00 bajini ja•man wana a•bachengaha aro uandaken walgimikan mikkarang dontonggija waangahani a•sel chirang dal•bae a•kawe jolrango chi banna a•bachengaha aro a•bri jolrangoba a•arang be•ruruna a•bachengskaaha.
Mongolbar walonin mikkarang dontonggija waangahani a•sel South Garo Hills a•jani Chokpot sub-division gita jokbaenggipa Deku chibimaba dal•bae, Budbar pringo Deku aro gipin songrangona dakanggipa ramani mongsonggipa dolongko pe•angaha.
East aro South Garo Hills a•ja gita jokangenggipa Simsang chibimaba Budbar pringode bewalan dal•baaha aro Baghmara bazar-ko man•chape bang•bata biaprangon manderangna kenjagokataniko on•angaha.
South Garo Hills a•jani Superintendent of Police (SP) Rituraj Ravi-ni kobor ra•timgipa manderangna u•iatani gitade, walgimin mikkarang dontonggija waanganichi badiaba badiaba biaprangode a•arang be•ruruaha aro uandaken Baghmara-o donggipa nokdang ge•gittamkode uamang naljoknagipa biapona apjitatna nangaha.
“A•arang be•na kenchakenggipa biapo donggipa nokdang ge•gittamko chinga skul nokrangona apjitangaha,” ine Ravi parakataha.
Mongolbar walonin mikkarang dontonggija waangahani a•sel South Garo Hills a•jani Kapasipara, Chokpot-ni Deku aro Sibbari jolrango chirang banskaengaha aro Tura-oni Dalu-ona dakanggipa NH-51 ramaoba a•arang be•dape aro bolrang be•e rama champengatako man•angaha ine kobor on•timgiparang u•iataha.
South Garo Hills a•jao Deku dolong baksana Dimapara dolongkoba chi pe•angaha aro Rangrachi-oni Dasin Bibra-ona dakanggipa ramarang aro dolongrangkoba chi mripaha ine South Garo Hills a•jani official-rang u•iataha.
Kobor on•timgiparangni u•iatani gitade, Rugapara, Dimapara aro Siju ramarangba Budbar salo bilongbee nosto ong•atako man•angaha aro Siju gita Baghmara-ona dakanggipa ramaba champengatako man•aha.
West Garo Hills a•jaoba bang•bata biaprangon, chi banani, a•a rurongani aro bol be•dapanirangko nikna man•angaha aro Tura-oba Dobasipara petrol pump sambao a•arang ramako rurongdapaha ine kobor on•aha.
West Garo Hills a•jani Deputy Commissioner Ram Singh-ni u•iatani gitade, a•a be•anirangko aro bolrangni pangpikanirangko Tura-Dalu ramao aro Selsella jolrango bang•en nikna man•aha aro Selsella jolo donggipa Singwil chibimaba dal•bana a•bachengahani gimin manderangna kenchakna nangani ong•engaha.
“Ramarango a•a be•anirangko NHIDCL-ni manderang rongtalatna a•bachengaha aro chinga Police, BDO aro SDRF-rang gita mikrakatanirangko on•ataha,” ine West Garo Hills a•jani Deputy Commissioner parakatenba, iandakmiting somoirango chiring sambarangona aro a•a be•na sienggipa biap sambarangona re•angjachina gita manderangko didiataha.
Indake ong•engon, East Garo Hills a•jaoba Simsang chibima dal•barorona a•bachengengaha ine East Garo Hills a•jani Deputy Commissioner Swapnil Tembe parakatenba, chibima sambarango donggipa manderangko naljokgnigipa biaprangona katdoe dongchina gita didiataha.
Da•o dipet East Garo Hills a•jao maming dal•a a•sel ong•ani koborrangko man•soa dongkuja aro a•a be•giparangko ta•raken rongtalatpilna man•aha ine Tembe parakataha.
July-ni 5 tarikona kingking mikkarang wakunaba gnang ine IMD-oni mikrakataniko on•angtaiskaaha.
