Tura, July 25 : Garo Hills-ni Dadenggre songo, sakgni me•chik bi•sarangko man•chape nokdang ge•sani sak 4 manderangko, montol dakenga ine potdraenba ong•gija bebe ra•anio pangchake chadrapaniko dakaha, jeni a•selan uamang janggitangko naljokatna gita kate chakna dra•atako man•aha.
West Garo Hills-ni Dadenggre civil sub-division-ni ning•o donggipa Sategre songni Hindalson Marak, saksa game ge•e cha•anio chu•sokgipa ong•an baksana ge•a gama gnanggipa a•ani nokgipaba ong•achim, jeon sakgni demechik aro jikgipa saksa gnangchim. Indake, songni manderang uni chu•sokaniko nike mikbuna a•bechengenba uamangni gimin tol•e kattarangko giproroatna a•bachengataha.
Ua saksa Nokgipana an•tangko on•kange kamko ka•gipa Kristian ong•e, an•tangni ge•a gamani aro matchu mate jillanikosan gisiko nang•e kamko ka•aigipa ong•oba, uko songni manderang montol dakenga ine matnanganiko dakaha.
Re•anggipa July jani 14 tariko, songni ka•o nang•e dongenggipa manderang uko chadrapenba uni nokdangni manderangko songoniko a•rike galataha.
“Uamang angko ka•saninggija dokenba sikan inenba a•kuangchina galatahachim, indiba rasong gnange anga chiringchina ga•akonangjaha. Anga miksela jaman ta•raken angni jikgipa aro demechikrangko sandibaaha, anga uamangko nikeoba angni nokjam chu•gimikkon uamang nosto ka•angahachim. Chinga be•entango gankap chinkap dake jenten re•ongkatbana gita man•aha,” inenba Tura-o ma•chake dongenggipa Hindalson Marak u•iatanagaha.
Ia chadrapaniara, uni a•ako ra•seke ra•na miksonganio ong•akon, maina songni manderang uko nokona re•bapilna, matchurangko ba ge•a gamanirangkoba palna gita on•jaengachim. Bebe gita ua nokona re•bapilgenchim ong•ode, nok ning•on ukoba so•chape galgen ineba songni manderang uko ka•mikkenataniko dakangaha.
“Angade nokona re•angpilnaba man•ja, gamjinrangko palnaba man•ja dakengjok. Angni demechik dal•batgipade October jao PUC porikka seani dongachim aro chonbatgipa demechikde class 5-o poraipaengachim, indiba school fee gamna mangmangba angode jako tangka gongsaba gri. Tura-ona re•bana mangmangan anga salni hajirako ka•esa uni tangkachi re•bana gita man•enga,” inenba social activist-ni noko dongenggipa, jajrenga gnanggipa pagipa demechik sakgni baksa suk ong•gijagipa jikgipani sepango donge aganangaha.
Uko nok ning•ao so•chapna ka•mikkenatgiparangoni saksa jekon, Havel Sangma ine mingachim, uan Tura-oni km 30 mangni gita chel•ao donggipa Jengjal-ni Baljek songo giljani pamong ong•e kamko ka•enggipa ong•achim.
Namgijana mingsinggipa Garo Hills-ni Mrigre-o montol dakgiparangko so•ota.
Re•anggipa 2016 bilsini January jao, West Garo Hills-ni Rongram jolo donggipa Mrigre songo, songni manderangni so•ote galgipa nokdang ge•sani sak 5 manderangni manggisirangko bang•e tu•gija cho•e dape galgipa gopramoniko Rongram police dolrang cho•bile nienba man•ahachim.
Ia ong•a obostaoba, songni manderang ia nokdangni manderangko montol dakenga ine matnanganiko dakenba ia indakgipa misilbegipa namgija kamko ka•ataona sokatan baksana ua jolo donggipa manderangkoba jagokataha.
Iano so•ota man•giparangara, Skulni skigipa: David M T Sangma aro uni pagipa Hedison B Marak, uni ma•gipa Hallen T Sangma, uni jikgipa Bala T Sangma aro uamangni depante Washing T Sangma ong•achim. Songni manderang iamangko boltongchi dokgake so•otaha aro uamangni manggisirangko wa•grimrara dakgipa biapo bang•e tu•gija a•kolko cho•enba gope galaha.
Police dolrangni am•sandie niani gitade, ia nokdangni tang•dororoaniko nikenba songni manderang mikneng mikbuenba bilsisa ong•na am•pile uamangko so•otna gita tarisamsoanirangko dakenba ia nokdangni manderangko so•otaha. Uamangni siani jamano, dongrikenggipa nokdangni demechikba nokni a•arangko a•kangna gita man•jaha, maina dos dakgipa songni manderangoni saksa niamgri uamangni a•ako a•kangman•ahachim.
Na·simang ia video-koba nina man·gen:
Na·simang iakoba poraina man·gen: Dr. KC Boro, bilsi chu•ongkugijagipa me•chik bi•sarangko drae kal•akani bidingo kakket bichal ka•e on•china Guv-ko mol•mola
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
