Tura, Apr 15: A•chikrangni gisik ra•na kragipa biaprangko ripinge rakkina songe on•gipa committee-ni skanggipa tom•aniko Mongolbar salo, Tura-ni Circuit House-o ong•atangaha aro ia tom•anio committee chanchirimangenba, Garo Labour Corps-ni Cenotaph-ko apsan biapon gital bimango tariskana tik ka•e donangaha.

Tura-ni Babupara jolo donggipa Garo Labour Corps-ni Cenotaph-ko gital dake riktaina miksongani gnang, Garo Hills-ni dingtang dingtang dolrangna aro manderangna u•iatchenggija pe•galahani gimin jegalgrimaniko man•ani ja•man ia committee-ko a•dok sorkari, a•dokni Cabinet Minister Marcuise N Marak-ni dilanichi songe on•angaha aro ia sak 28 membor donggipa committee-ni skanggipa tom•aniko Mongolbar salo ong•atangaha.

Ia committee-ni mongsonggipa daitoara, A•chikrangni daka rikanirango nangchakegipa biaprangko namdapatna ja•kurangko de•ani aro iandake A•chikrangni gamchatgipa biaprangko ripinge rakkina ja•kurangko de•anio agan-ku•pattianirangko on•anian ong•enga.

Tom•a matchotani ja•man kobor ra•timgiparangna talataniko on•angengon, ia tom•anio committee, a•gilsak gimikni skanggipa dakgrikanio kamrangko dakchake on•na gita an•tangtangko on•kange France a•songona re•anggipa pagitchamrangko gisik ra•na aro mande ra•na rikgipa Garo Labour Corps-ni Cenotaph-ko rikpiltaini gimin chanchirimangaha aro jinma chanchirimenba, ia cenotaph-ko apsan biapon rikpiltaina tik ka•e donangaha ine committee-ni Chairman aro Cabinet Minister Marcuise N Marak parakataha.

Ia cenotaph-ko gital bimango rikna aro tender-ko on•piltaina gitaba ia tom•anio committee tik ka•angaha ineba Marak aganaha.

Ia cenotaph-ko gital dake rikpiltaianio somoirangko nangkugen indiba Garo Labour Corps Day-ko maniani sal July 16 tarikde da•o sepangengahani gimin ia salko manina gita ia biapo cenotaph-ni bimangko dikdiksana songchengna committee tik ka•angaha ineba Marak aganaha.

Marak-ni aganani gitade, Garo Labour Corps Day-ko manianio ia cenotaph-ni bimangko dikdiksana tarichengna gita committee, joltangni architect Silchi Marak-ko okamna tik ka•e donangaha.

Ia cenotaph-ko rikgipa biap skangode iana bate dal•batachim indiba da•ode manderang napdraroroengani a•sel aro a•arang be•roroangengahani a•sel biaprang chonroroangengahani gimin iani bidingo inquiry-ko dakchina aro ia biapo retaining wall-ko rikchina gita committee, a•dok sorkariko didina tik ka•angaha ineba committee-ni chairman parakataha.

Da•o Garo Labour Corps Day-ko manichakenggipa biapara chondugaa aro ia salko manina gita dal•bata biapko nangengani gimin Garo Labour Corps-na dingtangmancha museum ba gallery-ko rikna gitaba committee chanchiangaha aro iana committee, ia cenotaph-ko rikgipa biaponi sambao donggipa Tura-ni gitcham Circuit House ba gitcham Public School-ko seoke donangaha ine Marak aganaha.

Ia cenotaph-o France a•songona re•anggipa mitam pagitchamrangni bimingrangde gimaenga ine nikahani gimin ia committee, gitcham cenotaph-oniko bimingrangko sandipilenba da•o gital cenotaph-o segatna gita sorkariko didina tik ka•angaha ineba Marak parakataha.

A•gilsak gimikni skanggipa dakgrikanio kamrangko dakchake on•na an•tangtangko on•kange France a•songona re•anggipa pagitchamrangko gisik ra•na aro mittelpilani gita je silchidarerangkon souvenir gita on•ahachim, ia silchidarerangni damko watna tik ka•anikoba ia committee namnikpaaha.

Ia committee-ni changgipin tom•aniko re•baenggipa April 30 tariko ong•atna tik ka•e donangaha.

Na·simang ia video-koba nina man·gen: 

Na·simang iakoba poraina man·gen: Bolsa motorcycleko  Mawlai-o so·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub