Tura, Oct 17: Re•baenggipa October-ni 29 tariko Garoland State Movement Committee (GSMC) aro National Federation for New States (NFNS) dolrang bakrimenba, Garo Hills-o songdongenggiparangna dingtang ‘Garoland’ a•dokko dabie jinma tom•bimonganiko ong•atenga ine u•iataha.
Garo Hills Autonomous District Council (GHADC)-ni Deputy CEM aro NFNS-ni vice president Nikman Ch Marak-ni parakatani gitade, ia jinma tom•bimonganiko Tura-ni Te•teng A•ja kal•chakramo ong•atanggen aro ia tom•bimonganio a•songni dingtang dingtang biaprango dingtang a•dokko dabienggipa dingtang dingtang dolni dilgiparangba re•bae bakko ra•anggen.
Garoland a•dokna dabianio bakrimaniko on•china gitaba Marak, dingtang dingtang dilgiparangko didiangaha.
“Dingtang Garoland a•dokna dabianio an•ching jat, torom, ma•drang mahari, chona dal•a mamingkoba basegija ku•cholsan ong•e bakrimangna,” ine Marak parakataha.
Ia tom•bimonganio bakko ra•echina gita dingtang dingtang dolrangko didiatengon, A•chik a•songo songdongenggipa manderang ku•cholsan ong•e ku•rangko on•genchimode Garoland a•dokna dabiani chu•sokgipa ong•chongmotgen ine GHADC-ni CEM aro NFNS-ni president parakataha.
