Tura, Sept 29: Meghalaya a·dokna kajinako ong·katata baksana kam ka·e cha·giparangna kamrangko on·na man·gnigipa, Jharkhand a·dokoniko namgipa gadangni koelako a·songgipinchi watatna gita dakianganio Garo Hills joloni saksa koela badinggipa cheeming A·chik a·songni sima jol gita koelarangko Bangladesh a·songchi watatna Meghalaya sorkarini bil on·aniko am·e dorkastoko on·angaha.
Jharkhand a·dokni gimik 50,000 metric ton koelarangko Bangladesh a·songchi watatna gita Coal India Limited-ni bil on·ako man·e dam bang·bate bregipana nilam ka·anio a·dokoni aro Garo Hills-oni saksa koela badinggipa aro gipinchina koela watgipa Georgeman Marak minggipa dakie chegipa ong·aha.
Indake ong·engon, ua dakigimin 3300 metric ton koelarangko rel gario gate salbagipaba Goalpara-ona sokeaha aro uarangko Assam-ni Golakganj gita a·songgipin Bangladesh-china watatgen.
Georgeman Marak, apsandake ia antio Coal India Limited-ni Assam-o gnigipa changna koelako nilam ka·attaigipaoba dakianggen.
Mese a·kol bita gita chacha niam gri a·doko koelako cho·e bikotanichi bang·a janggirang gimaa baksana biapko aro uni wilwilarangko nosto ka·engani gimin National Green Tribunal-ni champengataoni intalan Bangladesh a·songo koelako nanganiba namen tang·doskaaha.
Iani bidingo kobor ra·timgiparangna aganangengon, “A·dokni rama gita songsul a·song Bangladesh-china adita hajal metric ton koelarangko watatna a·dok sorkarini gakguaniko nangnike dorkastoko on·aha ine janapatan baksa, sorkari iana bilko on·genchimode GST, transport revenue-ni gita sorkari bang·a kajinarangko ong·katatna man·gen aro ia kamara gatna aro ra·onna nanggipa ong·ani gimin sak ritcha manderangna kamrangkoba ong·katatjolgen” ine Georgeman Marak an·tangni ka·dongsoenganiko parakataha.
Koelarangko gate watatnasienggipa ramani chel·ara Assam, Jogigopa-oni Garo Hills-ona km 150 mangni gitasan donga, jekon agangenchimode, apsan a·songchina Bhutan-chiniko rong·terangko salbae watatenggipanade namemanchan sepangbata.
“Mese a·kol bita gita a·doko koela cho·aniko NGT-ni champengatna skangde Meghalaya-oniko lak 75 metric ton koelarangkosan Bangladesh-chi watatna man·aiachim, uanoni lak 15 metric ton-rangkode Garo Hills-oniko mangmangan watatna man·achim,” ine Georgeman Marak, bading-chiwalaniko dakanichi a·dokna kajinarangko ong·katatanio aro manderangna kamrangko ong·katatanio man·gope baditana namgnirangko ra·baa uarangko gisik ra·atjolaha.
