Tura, Feb 19: Da·o re·baenggipa April jao ong·atna sienggipa Garo Hills Autonomous District Council (GHADC) election-o a·dokni gitcham MLA sakgni baksana da·o ong·enggipa Gambegre-ni MLA aro Nationalist Congress Party (NCP)-ni state president Saleng A Sangma-ba susana sienga ine koborko on·aha.
Gambegre-ni MLA Saleng Sangma, ia GHADC election-o Babelapara constituency-oni susana sienga aro ua ia election-o da·o ong·enggipa MDC Rightious Sangma baksa susaanggen.
Babelapara GHADC constituency-o susagrikna sienggipa Saleng aro Rightious salgnian skango Congress dolna apsan kam ka·rimgiparang ong·achim ine nikna man·a.
Saleng Sangma, uni skanggipa election-ko Congress dolni tikito susae chegipa ong·chengahachim indiba ja·mano una a·dokni gitcham chief minister Mukul Sangma, Congress dolni tikitko on·jahani gimin ia Congress doloni ong·katahachim.
Congress doloni ong·katani ja·man ua Independent candidate ong·e susaahaoba Gambegre constituency-o chegipa ong·taiaha aro Rightious Sangma-ba uni dakchakanichin GHADC election-o seokako man·skaahachim.
Indita bilsirangna apsan kam ka·rimani ja·man da·o ia chang GHADC election-o Saleng aro Rightious sakgnian, saksa sakgipinni kosako susagrikskana siengaha.
Ia chang GHADC election-o gitcham MLA-rangoniba Kharkutta-ni gitcham Congress MLA Cherak W Momin aro Rajabala-ni gitcham MLA Ashahel D Shira susana siskaenga.
