Tura, April 11: Re·baenggipa April-ni 12 tariko ong·atenggipa Garo Hills Autonomous District Council (GHADC) election-o kamrangko ka·na gita donatako man·gipa polling official-rang Sonibar pringonin an·tangtangni polling station-rangona re·chakatangtokaha.
West Garo Hills a·jao dam 13 GHADC constituency-ni ning·o donggipa dam 352 polling station-rango kamrangko ka·na donatako man·gipa polling official-rang Sonibar salon an·tangtangni polling station-rangona re·chakatangtokaha aro bangki dongkuenggipa dam 57 polling station-rangonaba Robibar salon polling official-rang re·chakatanggnok.
Apsan daken South West Garo Hills a·jaoba GHADC election-o kamko ka·na gita donatako man·gipa polling official-rang Sonibar pringonin an·tangtangni polling station-rangona re·chakatangtokaha.
South West Garo Hills a·jani dambri GHADC constituency-rang, chong·motan 11-Boldamgre, 12-Nogorpara, 13-Zikzak aro 14-Betasing GHADC constituency-ni ning·o gimik dam 128 polling station-rang gnang aro Sonibar salon dam 107 polling station-rango kam ka·na sienggipa polling official-rangde biaptangtangona sokangtokaha ine kobor on·aha.
Bangki dongkuenggipa dam 21 polling station-onaba Robibar salon polling official-rang re·chakatanggnok.
