Tura, March 30: Re·baenggipa April-ni 12 tariko ong·atenggipa Garo Hills Autonomous District Council (GHADC) election-o National People’s Party (NPP) chegopgen ine Meghalaya a·dokni Chief Minister aro NPP-ni national president Conrad K Sangma, an·tangni ka·dongsoenganiko parakataha.
Mongolbar salo, West Garo Hills a·jani Jengjal GHADC constituency-ni ning·o donggipa Dadenggre-o NPP-ni candidate Grahambell A Sangma-na campaign ka·engmiting somoio NPP-ni national president, ia kattarangko aganaha.
2015 bilsini GHADC election-oba Grahambell Sangma, ia apsan constituency-onin susae ge 46 vote-rangchisan amako man·rikahachim.
Voting NPP to power in GHADC with majority will ensure a synchronised reformation in the Council. I appeal to residents of Dadenggre under Jengjal, GHADC constituency to unite with us in our mission by voting for our candidate Grahambell A Sangma. pic.twitter.com/FD2undI0Hh
— Conrad Sangma (@SangmaConrad) March 30, 2021
Ia tom·anio Conrad K Sangma, jinmana aganprakangengon, Garo Hills gimikon NPP-ni balwa balengaha aro NPP-ni tom·bimonganirangko ong·atanio bang·bea manderang re·bae bakko ra·tokenga ine parakangaha.
Batanggimin salchetni gisepo ua dingtang dingtang a·jarangona wenange manderangni nangnikanirangko ma·simanaha ineba ua aganaha.
NPP-chi dilenggipa a·dok sorkarini kamrangni gimin janapangengon, a·doko an·seng baljokaniko on·ani, lekka porani aro songsalko namdapatani a·barangna bang·a tangka paisarang chame sorkari ia kamrangko namdapatna kamko ka·enga ine Chief Minister parakataha.
GHADC-o dingtanganiko ra·bana gitade, council-ko dilna gita manderang, NPP-ko seoke mangrakbatataniko on·na nanggen ineba Sangma aganaha.
District council-o dingtanganiko ra·bana gita ja·ku de·anirangko janapatengon, iana NPP-chi dilanggipa Executive Committee, dingtangmancha kamrangko a·bachengatahachim indiba somoirang bon·changahani a·sel iarangko chu·sokatna man·jaha ine Sangma parakataha.
Matchotgija donanggipa kamrangko matchotate district council-ko mangrakbatatna man·na gita GHADC election-o NPP-ko seoke gital Executive Committee-ko songna cholko on·china gitaba ua, Jengjal constituency-ni manderangko didiangaha.
