Tura, March 6: Re·baenggipa April 12 tariko ong·atenggipa Garo Hills Autonomous District Council (GHADC) eleksino susaangnasigipa sak 17 candidate-rangni skanggipa bimingrangko Bharatiya Janata Party (BJP), Sonibaro parakataha.
BJP dolni tikitchi susaangnagipa candidate-rangara — Siju-na Pa John Gunchong D. Shira, Silkigre-na Pa Wolden Sangma, Rongrikimgre-na Pa Heringstone Marak, Barengapara-na Pa Pramod Koch, Babelapara-na Pa Rightous N. Sangma, Tura-na Bernard N. Marak, Dengnakpara-na Pa Daniel M. Sangma, Nagorpara-na Pa Boston Ch. Marak, Zikzak-na Pa Bhupendra Hajong, Betasing-na Pa Bakul Ch. Hajong, Balachanda-na Pa Cyril S. Sangma, Shyamnagar-na Md Fozibar Rahman, Naguapara-na Pa Ranjit Rabha, Rongrong-na Pa Mamik M. Sangma, Damas-na Ma Lakitha D. Shira, Samandagre-na Pa Lopsing Marak aro Williamnagar-na Pa Greatwill Sangma.
GHADC-na pu·onatanio susana gita BJP, skanggipa changna bang·bata candidate-rangko seokange uamangna tikitrangko chamattokaha.
Ia 2021 bilsini GHADC eleksino susaenggipa a·songni political dolrangara – Congress, NPP aro BJP ia dolgitttaman mongsongbatgipa ong·enga aro ia dolrang baksa Meghalaya a·dokni mongsongbatgipa a·joltangni political dol UDP, sokbaenggipa eleksino Garo Hills-ni adita dam seat-rango susaanggen.
BJP tikito susaenggipa sak 17 candidate-rangoni da·omiting MDC ong·enggipa Pa Rightous N. Sangma, re·anggipa 2015 bilsini GHADC eleksino Babelapara elakao NCP candidate ong·e susaenba cheaha, indiba ianpakode BJP dolni tikit chamatachi ua ia GHADC eleksino susaangskagen.
Apsandaken, re·anggipa 2015 bilsini GHADC eleksino Tura elekao susae brigipa biapko man·e ga·akrikgipa Bernard N. Marak, ianpakni eleksinode uaba BJP-ni saksa candidate ong·e susaangskana gita tarisoenga.
