Tura, Feb 14: Garo Hills Autonomous Distrct Council (GHADC)-o sera-bera ong·enggipa obostarangni bidingo mikkangchi nambate kamrangko ka·angna gita Non-Gazetted Employee Association (NGEA), dingtang dingtang NGO-rang, pilak Nokmarang aro songni manderangko okamenba mijal Sonibar salo West Garo Hills-ni Asanang Community hall-o tom·e chanchirimaha.
GHADC-ko mikkangchi nambate ripingangna gita, NGO-rang, Nokmarang, songni-nokni dilgiparang aro songni manderang tom·e chanchirimna mijalo tom·aniko ong·atao, NGEA-ni jakrikra Brithen M. Sangma-ni jinmana parakatanio, “An·chingna dingtangmancha pattigimin GHADC-ko name ripingna nangchongmotenga. GHADC A·chikrangni mikkim-rasong ong·a, da·oni iana simsaksojaode GHADC gimagnok, unode A·chik jatni dakbewalrang-rikbewalrang, niam-retirang aro jatni daka-rikanirangko ripingna man·jawajok aro an·ching an·tangtangko A·chik ine aganna jatni maming identity ba sakki dongjawajok” ine ua aganaha.
“Chinga GHADC-o kam ka·enggiparang bilsi-gnina batpile dormahako man·jaoba duk-mikchi ong·e, sro-ra·chaktaitaieba office-o kamko ka·aha, indiba chingni indakgipa neng·nikaniko bil gnange iako jako ra·e nirokatgiparang ma·sichakjaha. Chinga tangka-paisa dongjae aiao inmanpilgipa neng·nikaniko chagrongengani giminsa chingni chu·gimik dormahako GHADC eleksinna skangan on·china dabienga, indiba chingna dormaha on·na man·jaode, election-o bakko ra·jawa ine parakatmanaha. Iako dabiengon chingni man·gnina mangmangsan ong·ja, indiba ong·siangenggipa GHADC-ko namdapatna miksonganio, NGO-rang, pilak Nokmarang aro songni manderangko okame na·simangni dakchakpaaniko aro jak on·paaniko nangnike chinga da·alo na·simangko ia biapona okamaha” ineba NGEA dilgipa agan-talataha.
Unbaksana, GHADC-ni bilgrianiara kajina man·enggipa tangka-paisa gimikko simsakgija jakkalani a·sel kam ka·enggiparangna dormahako on·na man·jaenga, kajinarangko jaanti man·soenga, indiba tangka-paisarang bachi gimaangenga ma·sina man·piljaha ineba ua agankuaha.
GHADC-o sera-bera ong·ani a·selde Planning Committee dongjani a·selba ong·enga, da·ona kingkingba GHADC-o Finance Rules aro Service Rules dongkuja. Ia niamrangko GHADC-o ra·gatgenchimode MDC-rang skatang Committee baksa chanchichenggija tangka-paisarangko jakkalna man·jawachim. Uni gimin GHADC-o Planning Committee-ko chugipa gadangni gita songechina didiatenba a·dokni Governor-na proposal-ko on·na gitaba tik ka·angjolaha.
Secretary-ni GHADC-o kam ka·chengaoni bilsi-gni gapahaon ja 11-ni dormahako on·na man·aha ine agananggipa kattana, NGEA-ni padot Senora Jhony Arengh suk ong·gijaniko parakenba, uni (secretary) agangipa kattana aganchakatskaiengon, uni bilsi-gni ong·piloba ja 11-ni dormahako on·aha ingipa kattara kakket ong·ja aro ra·chakna amgijani ong·a aro on·bebeode chu·gimik ja 24-ni dormahakosa on·na nangachim, indide ja 13-ni dormaha bachi gimaskajok ine ua sing·doangaha.
Unomitingo GSU-CEC-ni padot Tengsak Momin, tom·anio dongpae jinmana aganengon, chinga 2008 bilsionin GHADC-o donggipa gipin jatrangni electoral roll-ko sandie den·galjok, indiba chingni kam ka·ako jegalgijagiparangba dongtaia. Na·simang re·baenggipa GHADC election-ko champengatna miksongode na·simang ku·mongna nanggen, chingaba ka·gen maina chingade skangoni champengatrongbaenga, case ka·oba jatni namgninasa kamko ka·anggen. Uni gimin na·simang ka·dongesa kamko ka·bo aro jinma ku·monganiko watgalnabe aro jajrengna nangja, chinga na·simangna chu·gimikan chakpaaniko on·gen ine Momin parakataha.
Indake ong·engon, re·baenggipa GHADC election-ko champengatna am·ani giminde iana skangan aganmanjok, indiba chinga iani bidingo mikkang antio tom·e chanchiangtaikugen. Dormaha man·jaode pu·onanio chinga bak ra·jawa ine NGEA-ni sakgipin dilgipa agandapataha.
