Baghmara, Feb 13: Garo Students Union (GSU), Chokpot Regional Unit, re·baenggipa April jani 9 tariko Garo Hills Autonomous District Council (GHADC)na pu·onaniko on·atnasienggipao songdongpagipa gipin jatrangni susagniko raken champengata baksa jakgitel ong·e susagnigipa candidate-rangni nomination file ka·anganikoba dontongatchina gita mikrakataha.
GSU, Chokpot Regional Unit-ni jakrikra Tangke R. Marak-ni koborna u·iatanio, GHADC-ara A·chik jatrangni nokdangsa ong·a, uni gimin A·chik a·songo songdongpagipa gipin jatrang GHADC-o MDC ong·na kraja ine aganenba, gipin jatrang jattangni niamko ma·siana agre A·chikrangni ja·rikbaenggipa dakbewal-rikbewal aro niam-retirangni gimin mamingkoba ma·sija, indide maikai GHADC-ko namroro-silroroatna kam ka·na man·gen. Uamang jattangni namgnina ba jattangko Garo Hills-ona rimbae a·a ra·sekna aro nokkap bree napsikna cholko ra·giparangsa ong·a ine ua parakataha.
Gipin jatrang maming saloba A·chikrangni skie ra·ram ba nokdringona napbae bading-chiwalaniko dakna man·ja aro maming dakeba A·chik jatni ba a·bri jolni manderangni a·a-chio, jatni dakbewalo, niam-retio, jatni daka-rikanirango bakko ra·pae A·chik jatko sason ka·na bil dongja ine janapatan baksa, a·jani pilak political dolrangkon iani bidingo ning·tue chanchienba A·chik jatni kosako kragija kam ka·pajachinaba GSU didiangaha.
Batanggimin chango GHADC-na pu·onatanirango a·jani dingtang dingtang political dolrangni gipin jatrangna party ticket on·e susaatani a·sel GHADC-ko sasono done A·chikrangko nokkol itpangpilanirangko sakantian ma·sia ine janapatengon, GHADC-de A·chik jatrangnisa, gipin jat ba rorirangni a·dok chiga ong·ja, uni gimin A·chik candidate-rangnasan party ticket-ko on·na nanga. Iani gisepon manigija GHADC election-o gipin jatrangna tikitrangko on·drae susaattaigenchimode, GSU iana bilaken warachakgen aro jegalaniko dakanggen ineba mikrakatjolaha.
