Tura, Jan 31: Garo Hills Autonomous District Council (GHADC)-ni gital chief executive member (CEM)-ko seokna election-ko ong•atanio, GHADC-ni gitcham Chairman Rakesh A Sangma, 15 vote-rangko man•e chegipa ong•aha. Unbaksa susagipa GHADC-ni gitcham CEM Benedic R Marak, 13 vote-rangkosan man•rikskaaiaha.
Re•anggipa Sonibar salo, GHADC-ni gitcham CEM Benedic Marak-ni kosako NPP-ni MDC-rang, no-confidence motion-ko dakanio amako man•ahani gimin Marak, CEM-ni biapko wate on•na nangahachim.
2020 bilsini GHADC election-o Benedic Marak, NPP-ni MDC ong•e seokako man•ahachim indiba CEM ong•ani ja•man ua NPP-ni kosako chakate All India Trinamool Congress (AITC) baksa bakrimaniko on•ahani gimin NPP-ni MDC-rang, uni kosako chakate, No-Confidence Motion-ko ra•gatangahachim. Da•o dipet ua NPP-ni member ong•aonikode watsranga ong•skakujaengachim.
GHADC-ni gital CEM-na seokako man•gipa Rakesh Sangma-ba Babelapara-ni NPP MDC ong•a aro Sonibar salo, Marak-ni no-confidence motion-o amako man•ani ja•man ua, CEM-ni biapna susana gita Chairman-ni kamko watskaahachim.
CEM-ni biaponiko ra•ongala man•gipa Benedic Marak-ni kamrango ka•dongchakna man•jae, re•anggipa antio saksku Executive Membor-rang, kamtangtangko wattokahachim aro uandaken GHADC-ni gitcham Executive Committee be•gruna a•bachengahachim. Iani ja•mano Executive Committee-ni chairman ong•enggipa sakgittam member-rangkoba Marak ra•galenba, uamangni biaprangko Trinamool Congress-ni member-rangna on•skaahachim.
Executive committee-ni ning•o be•gruaniko nike, CEM-ni kosako no-confidence motion-ko ong•atna man•na gita special session-ko ong•atchina Meghalaya a•dokni Governor Satya Pal Malik, re•anggipa January-ni 27 tariko ge•etaniko on•angaha.
No-Confidence Motion-o amako man•ahani gimin gital CEM-ko seokna election-ko ong•aton, NPP MDC-rangni pu•onanichi GHADC-ni gitcham Chairman Rakesh Sangma chegipa ong•na man•aha.
Rakesh Sangma-na pu•ongipa MDC-rangoni, UDP MDC Ashahel D Shira baksana Trinamool Congress-oni ma•ekgipa MDC sakgni, chong•motan Boldamgre-ni MDC Stevie Marak aro Shyamnagar-ni MDC Habibuz Zaman-ba ong•paahachim.
Gitcham CEM Benedic Marak-na Trinamool Congress-ni MDC-rang baksana Tura-ni BJP MDC Bernard N Marak aro Barengapara-ni BJP MDC Promod Koch-ba pu•onskaaha.
