Chokpot, April 26: South Garo Hills a·jani Chokpot Civil Sub-Division-ni ning·o songdongenggipa manderang Chokpot SBI branch-oniko an·tangtangni tangka-paisarangko oke jakkalna gita namen neng·nikako man·tokengani gimin Sombar salo Rongrikimgre-ni gital MDC aro GHADC-ni dakchakgipa CEM, Te Nikman Ch. Marak, Chokpot SBI-ni Branch Manager-na lekka sedoangaha.
Chokpot jolo songdongenggipa manderang an·tangtangni chimonggimin tangka-paisarangko oke jakkalna namen neng·nikaniko man·tokengani gimin, manderangni namgnina Automatic Teller Machine (ATM)-ko Chokpot SBI branch-o ta·raken kulie on·pachina, Branch Manager-ko mol·molaha ine Te Nikman Marak u·iataha.
Chokpot jolni wilwilao songdongenggipa manderang ru·utbea sal ba somoirangonin Chokpot SBI branch-o ATM-ko kulie on·china dabitokengachim, indiba da·alona kingkingan ATM ge·sakoba kulie on·kuja ine talatan baksa, jolni manderang jedakode an·tangtangni chimonggimin tangka-paisarangko nangani somoirango altuae oke jakkalna man·gen, ia miksonganio Chokpot SBI-ni branch manager baksaba golpogrikangjolaha ine Te Marak koborna u·iatdapaha.
